Қытайдағы турнирде қазақстандық жасөспірім топ жарды. 13 жастағы қазақстандық тоғызқұмалақтан өткен жарыста қарсыластарын басып озып, жеңімпаз атанды. Ал екінші және үшінші орындарды қытайлық студенттер иеленді, деп хабарлайды DKNews.kz.
Турнир 25 қазанда Бейжіңдегі Қазақстан мәдени орталығында өтті. «Ұлттық мұра – ұрпаққа аманат» атты іс-шара Республика күніне орай ұйымдастырылды.
32 қатысушының арасынан қазақстандық жасөспірім үздік шықты
Жарыста 32 ойыншы бақ сынады. Олардың тек екеуі ғана Қазақстан азаматы болды.
Тартысты бәсекеде 13 жастағы қазақстандық бірінші орынды жеңіп алды. Ұйымдастырушылар ұсынған ақпаратта жас жеңімпаздың есімі көрсетілмеген.
Екінші және үшінші орындарды Бейжіңдегі Орталық ұлттар университетінің қытайлық студенттері иеленді.
Бұл нәтиже қазақтың ұлттық зияткерлік ойынына Қытай жастарының да қызығушылық танытып отырғанын көрсетті. Қытайлық қатысушылар ойын ережелерін меңгеріп қана қоймай, үздік үштікке енді.
Жеңімпаздар мен жүлдегерлерге Қазақстан Республикасы Тоғызқұмалақ спорты федерациясының президенті Әкім Тұрсын атынан арнайы сыйлықтар табысталды.
50-ге жуық адам тоғызқұмалақ ойнауды үйренді
Турнир аясында өткен мәдени-спорттық шараға дипломаттар, қазақстандық және қытайлық студенттер, білім беру және өнер саласының өкілдері, сондай-ақ Бейжің тұрғындары қатысты.
Тоғызқұмалақ бойынша шеберлік сабағына 50-ге жуық адам жиналды.
Қатысушыларға ұлттық ойынның тарихы мен негізгі ережелері таныстырылды. Бұдан кейін олар ойын тақтасының басына отырып, өзара бақ сынап көрді.
Қытайлық қонақтар үшін бұл қазақ халқының дәстүрлі зияткерлік ойынымен жақынырақ танысуға мүмкіндік болды.
Іс-шараны Бейжіңдегі Қазақстан мәдени орталығы, Дүниежүзілік тоғызқұмалақ федерациясы және Қазақстан Республикасы Тоғызқұмалақ спорты федерациясы ұйымдастырды.
Жоба Қазақстанның Қытай Халық Республикасындағы елшілігінің қолдауымен жүзеге асты.
Қазақстан мен Қытай тоғызқұмалақты дамытуға уағдаласты
Бейжіңдегі кездесу тек спорттық жарыспен шектелген жоқ.
Қазақстан мәдени орталығы мен Қазақстан Республикасы Тоғызқұмалақ спорты федерациясы өзара ынтымақтастық туралы меморандумға қол қойды.
Құжат Қытайда тоғызқұмалақты кеңінен насихаттауды, бірлескен мәдени-ағартушылық жобаларды жүзеге асыруды және спорттық іс-шаралар ұйымдастыруды көздейді.
Бұл келісім қазақстандық тарапқа қытайлық аудиториямен байланысты бір реттік турнирлер арқылы ғана емес, тұрақты бірлескен жобалар негізінде дамытуға мүмкіндік береді.
Әзірге алдағы іс-шаралардың нақты мерзімі мен жоспарланған жарыстар саны жарияланған жоқ.
Қазақтың ұлттық ойынына шетел жастары қызығушылық танытуда
Тоғызқұмалақ халықаралық жарыстарда ойналып жүр. Қазақтың дәстүрлі зияткерлік ойыны Қазақстаннан тыс жерлерде де өз аудиториясын қалыптастыруда.
Бұған дейін біз тоғызқұмалақ әуесқойларын, жаттықтырушылар мен жарыс ұйымдастырушыларын біріктіретін 9Qum халықаралық платформасының іске қосылғаны туралы жазған едік.
Платформаға алғашқы үш күнде шамамен 1 400 адам тіркеліп, 9 мыңға жуық партия ойналған.
Тоғызқұмалақтың шетелде танылып келе жатқанына тағы бір мысал – Литвада өткен халықаралық балалар турнирі. Онда Қазақстан, Литва және Латвияның жас ойыншылары бақ сынаған.
Енді мұндай жарыстардың географиясына Бейжің де қосылды. Оның үстіне Қытай астанасындағы турнир екі ұйым арасындағы ынтымақтастық туралы келісіммен аяқталды.
Ал жарыстың қорытындысы ерекше назар аудартты: 32 қатысушының екеуі ғана қазақстандық болғанымен, бас жүлдені 13 жастағы отандасымыз жеңіп алды. Қалған екі жүлделі орын Қытай студенттеріне бұйырды.
