Курсанттардың әскери ант беру рәсімі Алматыдағы 28 гвардияшы-панфиловшылар саябағындағы Мәңгілік алауда өтті, деп хабарлайды DKnews.kz.
Биыл Сағадат Нұрмағамбетов атындағы Құрлық әскерлерінің әскери институтына 500-ге жуық курсант түсті.
- Конкурста әр орынға үш адамнан таласты. Бұл жыл сайын біздің институтта оқуға ниет білдірушілер саны артып келе жатқанын көрсетеді. Оқуға түскендердің арасында Отан қорғаушы мамандығын саналы түрде таңдаған 90-нан астам мерзімді қызмет сарбазы бар. Олар "Срочники 2.0" мемлекеттік бағдарламасымен оқуға емтихансыз қабылданып отыр", – деп нақтылады ҚР Қарулы күштері Құрлық әскерлері бас қолбасшысының орынбасары полковник Бауыржан Әбиров.
Биыл ҰҚШҰ-ға қатысушы мемлекеттер арасындағы келісім шеңберінде Қырғызстан мен Тәжікстаннан 14 курсант оқуға қабылданды.
Болашақ офицерлерге қолдау білдіруге Қарулы күштердің ардагерлері, Түрксіб ауданы әкімдігінің өкілдері, бірінші курс курсанттарының туыстары мен жақындары келді.
Салтанатты іс-шара үшінші курс курсанттарының қару-жарақпен саптық тәсілдерді орындаған көрсетілімімен аяқталды.
Ант беруші курсанттар туыстары мен жақындарының құттықтауларын қабылдап, алғашқы сейілге жіберілді.
