Қорғаныс министрінің бірінші орынбасары Семей қаласындағы аумақтық қорғаныс бригадасына Жауынгерлік ту табыстады, деп хабарлайды DKnews.kz.
Қарулы күштер Бас штабының бастығы генерал-лейтенант Сұлтан Қамалетдинов Абай және Өскемен гарнизондарында болды.
Семей қаласындағы орталық алаңда Жауынгерлік Ту тапсыруға арналған салтанатты рәсім өтті. Оған «Шығыс» өңірлік қолбасшылығы әскерлерінің қолбасшысы полковник Жеңіс Маралов, Абай гарнизоны әскери бөлімдерінің жеке құрамы және «Жас ұлан» ерлер лицейінің тәрбиеленушілері қатысты.
ҚР Қарулы күштерінің Жоғарғы Бас қолбасшысы Қасым-Жомарт Тоқаевтың грамотасын оқығаннан кейін Қорғаныс министрінің бірінші орынбасары генерал-лейтенант Сұлтан Қамалетдинов 99280 әскери бөлімінің командирі полковник Мүслім Күзубаевқа Жауынгерлік ту табыс етті.
"Әскери бөлімнің Жауынгерлік туы – Қарулы күштерге жататындығын көрсететін ерекше құрметті символ. Бұл әскери жәдігерді барлық әскери қызметшілер – қатардағы жауынгерден генералға дейін үлкен құрмет тұтады. Жауынгерлік ту әскери бөлімнің ар-намысының, ерлік пен батылдықтың бейнесі болсын" Генерал-лейтенант Сұлтан Қамалетдинов
Өскемен гарнизонында Қорғаныс министрінің бірінші орынбасары 27943 әскери бөлімінің, Шығыс Қазақстан облысы аумақтық қорғаныс бригадасының инфрақұрылымдық объектілерімен танысып, әскери қызметшілердің оқу-жаттығулары өтетін полигонның оқу-материалдық базасының жай-күйін зерделеді.
Әскери бөлімдерде генерал-лейтенант Сұлтан Қамалетдинов командирлердің ағымдағы жағдай, бөлімшелерді жасақтау және олардың жауынгерлік мүмкіндіктері туралы баяндамаларын тыңдады.
Сапар қорытындысы бойынша ол өңірдің қорғаныс қабілетін нығайту, бөлімшелердің техникалық жарақтандырылуын және жеке құрамның дайындық деңгейін жақсарту бойынша бірқатар тапсырмалар қойды.
