ҚР Қаржы министрлігінің өкілдері еліміздің өңірлерінде ірі бизнес пен ШОБ субъектілері, сондай-ақ жергілікті билік өкілдерінің қатысуымен кездесулерді өткізуді жалғастырып жатыр. Бұл жолы Қарағандыда отандық тау-кен секторына салық салу мәселелеріне арналған жиын ұйымдастырылды, деп хабарлайды DKnews.kz.
Қарағанды облысы көмір, темір-марганец пен полиметалл кендерінің және басқа да пайдалы қазбалардың мол қоры шоғырланған Қазақстандағы минералдық-шикізаттың ірі өңірі болып саналады. Облыста 604 жер қойнауын пайдаланушы жұмыс істеп келеді. Оның ішінде «Қазақмыс» және Qarmet бар. Тау-кен өндіру мен өңдеу салаларында 113 мың адам немесе облыста жұмыс істейтін халықтың 20% астамы жұмылдырылған. Осы жылдың 10 айында өңір кәсіпорындарынан түсетін салық түсімдері 507 млрд теңгеден артты.
Қаржы министрі Мәди Такиев пен Қарағанды облысының әкімі Ермағанбет Бөлекпаев үш өңірдің (Қарағанды, Павлодар және Ақмола облыстары) кәсіпкерлеріне жаңа Салық кодексі салық қызметіндегі әкімшілендіруді жеңілдету есебінен бизнеске қолдау көрсетуге бағытталғанын айтты.
Атап айтқанда, жаңа Салық кодексінде маңызды фискалды кірісі жоқ төлемдерді алып тастау қарастырылған.
«Мемлекет басшысы Қазақстан халқына Жолдауында Үкіметке бизнесті жүргізуге жағдайды жақсартуды тапсырған болатын. Жаңа Салық кодексінде бірыңғай жер салығын жеке табыс салығына ауыстыру ұсынылып отыр. Айталық, 3 төлемді біріктіру ұсынылған: су ресурстары мен орманды пайдалану, сондай-ақ жануарлар әлемін пайдалану үшін. Тұтастай алғанда, төлем мөлшерлемелерінің көлемі 77-ге қысқарады. Алымдардың 6 түрін қысқарту ұсынылып отыр. Олар бойынша мөлшерлемелердің 34 түрі алынып тасталады. Сондай-ақ мемлекеттік баждардың 5 түрі алынып тасталады, олар бойынша мөлшерлемелер 51-ге қысқартылады» Мәди Төкешұлы
Салық төлеушілердің барлық санаты үшін субъективтілік мөлшеріне қарамастан инвестицияларға «балама» ынталандырулар берілетін болады.
Ғимараттарды, құрылыстарды, машиналарды, жабдықтарды, бағдарламалық қамтамасыз етуді сатып алу/салу шығындарын оның функционалды мақсатына байланыстырмай біржолғы 100% шегеру түрінде инвестициялық салық преференциялары ұсынылады. Сонымен қатар жеке өндіріс өнімдерін өндіру және сату үшін табыс салығының төмендетілген мөлшерлемесі ұсынылады.
ҚР ҰЭМ Салық және кеден саясаты департаментінің директоры Ерлан Сағынаев жаңа Салық кодексінің жобасы сарқылып жатқан кен орындарында өндірісті сақтап қалуға мүмкіндік беретін шараларды қарастыратынын айтты.
«Техногенді минералды түзілімдердің құрамынан пайдалы қазбаларды өндіру үшін ПҚӨС төмендетілген мөлшерлемелерін белгілеу ұсынылады. Біз бұл шаралар қаржы көрсеткіштерін жақсарту және өндіру көлемін ұлғайту есебінен бюджетке қосымша түсімдерді қамтамасыз ететініне сенімдіміз» ҚР ҰЭМ Салық және кеден саясаты департаментінің директоры
Кездесуге қатысушылар ашық диалог пен тығыз байланыс тау-кен саласының одан әрі орнықты өсімі мен бюджетке тұрақты түсімдерді және жалпы ел экономикасын нығайтуды қамтамасыз ететін тиімді шешімдерді табуға мүмкіндік беретініне сенім білдірді.
