«Қазақ Құрылыс және сәулет ғылыми-зерттеу және жобалау институты» АҚ ғимараттары мен құрылыстағы сейсмикалық төзімділік секторының жетекші инженері Ғани Темірәліұлы Жапония Халықаралық ынтымақтастық агенттігі (JICA) ұйымдастырған оқу бағдарламасына қатысуда. «Маңыздылығы жоғары ғимараттар үшін сейсмикалық апаттар қаупін азайту жөніндегі шараларды күшейту үшін бірлескен шешімдер жасау» бағдарламасы Жапонияда 2024 жылғы 20 қазан мен 14 желтоқсан аралығында өтеді, деп хабарлайды DKnews.kz.
Бағдарлама аясында қатысушылар басқа мемлекеттерден келген әріптестермен және сарапшылармен танысып, сондай-ақ жер сілкінісіне төзімділіктің негізгі мәселелерін талқылайды. Семинардың ашылуында ғимараттардың негіздерін есептеу мен талдаудың заманауи технологияларын игеруге бағытталған алдағы оқытудың негізгі міндеттері айтылды. Оқыту Ғани Темірәліұлы мен оның әріптестеріне өз білімдерін тереңдетуге және құрылыс нысандарының қауіпсіздігін арттыру үшін озық әдістерді енгізуге мүмкіндік береді.
Жапонияның халықаралық ынтымақтастық агенттігі (JICA) тұрақты дамуды қолдауда жетекші рөл атқарады және апат қаупін азайтуды қоса алғанда, әртүрлі салаларда техникалық көмек пен білім береді. Бұл тәжірибе сейсмикалық белсенді аудандарда маңызды ғимараттар мен құрылыстардың қауіпсіздік деңгейін арттыруды талап ететін Қазақстан үшін ерекше маңызды.
Айта кетейік, «ҚазҚСҒЗИ» АҚ Күншығыс елімен 20 жылдан астам уақыт бойы сейсмикалық қауіпсіздік саласында тәжірибе алмасып келеді. Осы жылдар ішінде ынтымақтастық бағдарламасы аясында институт қызметкерлері Жапонияның сейсмологиялық орталықтарында тағылымдамадан өтуді жалғастыруда, бұл жер сілкінісіне төзімділік саласындағы білім мен практиканы айтарлықтай нығайтуға мүмкіндік берді.
