Күзгі әскерге шақыру науқанында Аягөз гарнизоны танк әскери бөліміне еліміздің түпкір-түпкірінен келген сарбаздарды әскери бөліммен таныстыру жұмыстары ұйымдастырылды, деп хабарлайды DKnews.kz.
Аталмыш шара барысында жас толым әскери бөлімнің тарихымен, басшылық құрамымен және жеке құрамның жауынгерлік даярлықтағы жетістіктерімен танысты. Таныстыру жұмысы ең алдымен әскери бөлімнің қару-жарақтарымен, шығу тарихынан сыр шертетін шағын мұражайдан басталды. Онда әскери бөлімдегі елеулі оқиғалар, атқарылған жұмыстар, жеткен жетістіктер сарбаздардың назарынан тыс қалмады.
Сарбаздар экскурсиясы одан ары әскери техникалар орналасқан аллеяға баруымен жалғасты. Ол жерде Отан қорғаушыларға ауыр ұрыс машиналарының шығу тарихы мен техникалық сипаттамалары жайында қызықты ақпараттар жеткізілді.
– Бүгін өзіміз бір жыл қызмет атқаратын танк әскери бөлімімен танысып жатырмыз. Осы шағын экскурсия барысында бізге командирлеріміз қару-жарақтар мен мәдени демалу орталығы, әскери бөлім мұражайы және кітапхананы көрсетті. Мен өзім әдеби кітаптарды көп оқитындықтан, маған әскери бөлімде қызықты кітаптарға толы кітапхананың болғаны қатты ұнады, – деді Ақтөбеден келген жас толым Алтынбек Ырғызбаев.
Қазіргі уақытта жас сарбаздар жауынгерлік дайындықтың жоспары бойынша саптық, тактикалық дайындық сабақтарын оқып, әскери жарғыларды және жалпы күн тәртібін меңгеруде. Әскери борышын атқару барысында жас сарбаздар ізгі қасиеттерді бойларына сіңіріп, табанды әрі төзімді болуды үйренеді.
