Қазақстан Республикасы Конституциясының 36-бабында "Қазақстан Республикасын қорғау оның әрбір азаматының қасиетті борышы және міндеті болып табылады. Азаматтар Заңда белгіленген тәртіппен және түрлерде әскери қызмет атқарады",- делінген.
Ия, Ата заңымызда айқын жазылған міндетті асқақ абыроймен атқарып, жүрген жалынды жастар көп-ақ. Солардың бір бөлігі еліміздің ішкі тыныштығының қалқаны болған Ұлттық ұлан қатарында қызмет етеді. Жылына 2 шақырылыммен әскерімізге келетін жауынгерлер бір жыл ішінде өздеріне жүктелген міндеттерді бұлжытпай орындап, әскери қызметтің дағдыларын игеріп, нағыз ұлан боп шығады.
Шымкент қаласындағы 6698 әскери бөлімінде мерзімдік қызметін өтеп жүрген сарбаздарымыз да әскери бөлімнің жауынгерлік дайындығына салмақты үлес қосады. Өткен жылдың желтоқсан айында әскери бөлімнің табалдырығын аттаған жастар, жауынан жасымайтын жауынгер болып, мерзімдік қызметін аяқтағалы отыр. «Сен тұр, мен атайын» деген сарбаздарымыз ішінде үлгілі тәртібімен, адал азаматтығымен, қырағы қызметімен, белсенділігімен, ұшқыр білімімен көзге түсіп, жауынгерлік жолына жарқын із қалдырған бірқатар сарбаздарымыз жайлы айтпақпыз.
Ефрейтор Базарбай Алмат Махмұтұлы Президентіміз жаңа атау берген қазіргі Қонаев қаласында 2005 жылы 8 сәуірде дүниеге келген, отбасының тұңғыш перзенті.
Мектепті аяқтаған соң, білімін колледжде жалғастырады. Дипломын алған соң, ата-анасына, бауырларына қолғабыс көрсетіп әртүрлі қоғамдық орындарда жұмыс жасайды. Алайда алға қойған бір мақсаты - жоғары білім алу еді. Әкесінің ақылымен жоғару оқу орнына түсуге дайындалады. 2023 жылдың желтоқсан айында әскер қатарына шақырту алады. Осылайша Шымкент қаласына Отан қорғауға аттанады. Әскери қызметтің алғашқы дайындығы аяқталған соң, әскери ант қабылдайды. Салтанатты шараға Алматтың ата-анасы келіп, ұлдарының нағыз жауынгер болғанын көріп қуанады. Алмат: «Әкем ант қабылдап болған соң, арқамнан қағып, құттықтап тұрып, әскери анттың артында халықтың, елдің, Отанның үлкен аманаты тұрғанын, анттан аттауға болмайтындығын бір ауыз сөзбен санама құйып кетті. Осыдан кейін менің бір сәтте жауынгерлік жолдан таюға ешқандай құқым жоқ еді», - дейді. 1 атқыштар ротасында жауынгерлік қызметін бастаған Алмат әрқашан озат, үлгілі, сауатты сарбаз бола білді. Колледжде алған шаштараз мамандығы әскери ортада пайдасы тиді. Денсаулықтың кепілі - тазалық бірінші орында тұратын әскерде ұқыптылық, жинақылық әрқашан сарбаздар сабының сәні еді. Тәртіпке сай қарулас достарының шаш үлгісін шеберлікпен алып, көңілдерінен шығатын Алматқа олардың айтар алғысы да аз емес. Әскерге келген күннен бастап сарбаздар арасында Президентіміздің бастамасымен жүзеге асып келе жатқан жобаның бірі мерзімдік қызметін атқарған жастарға тегін білім гранттарын бөлу туралы түсіндірме жұмыстар белсенді жүргізілді. Бұл Алматтың жоғары білім алу туралы мақсатын орындаудың оңтайлы жолы болды. Қалайда осы сертификатты иелену үшін барын салып, үлгілі қызмет етті. Еңбек еш кетпеді, қазан айындағы конкурс қорытындысы бойынша Алмат Әл-Фараби атындағы Қазақ Ұлттық Университетіне грант сертификатын жеңіп алды. «Конкурс қорытындысын естігенде қуанышымда шек болған жоқ, бір жыл бойы дене шынықтыру дайындығы, жауынгерлік дайындық, мемлекеттік-құқықтық дайындық сияқты пәндерді өте жақсы үйретіп, менің үздік бағалар алуыма көмектескен рота командиріне, взвод командиріне, взвод сержантына алғысым шексіз. Олар менің арманымның орындалуына жол ашқан тұлғалар десем де болады»,- дейді қуанышымен бөліскен Алмат.
Осындай үлгілі сарбаздардың бірі – ефрейтор Таимов Мақсат әскер қатарына Қызылорда қаласынан шақырылды. Мақсат та, әскери қызметте өзін жақсы жағынан көрсетіп, командирлер мен сержанттарға нағыз көмекші, адал дос бола білген жауынгерлер қатарында. Әскерге келгеннен бастап өзінің суретшілік, шығармашылық талантының арқасында ротаның белсенді жастар орталығын басқарды. Жауынгерлік үнпарақ, әртүрлі атаулы күндер мен мерекелерге орай шығарылатын қабырға баспаларының авторы болды. Ротадағы шығармашылық іс-шаралардың басы-қасында өзі жүрді. Әскери бөлімнің жауынгерлік қызметіне өзінің алғырлығымен, қырағылығымен, үлгілі тәртібімен үлес қосқан Мақсатты әңгімеген тартқан болатынбыз.
«Мен Қызылорда қаласында 2004 жылы дүниеге келдім. 2019 жылы мектепті аяқтаған соң, М. Мәметова атындағы педагогикалық колледжіне оқуға түстім. Өзім мұғалім мамандығын таңдадым. 2023 жылы әскерге шақырту келді. Ойланбастан әскери міндетімді орындауға аттандым. Әскери қызметке бірден үйреніп кеттім, оңай болды деп айта алмаймын, өзіне жараса қиындығы да, қызығы да болды. Алғаш қару алып, оқу-жаттығу алаңына барғаным есімнен кетпейді. Одан кейін басты міндетіміз жауынгерлік қызметімізді орындауға көштік, алдымен тәжірибеден өттік, 3 сағат сақшы болып тұруға үйрендік. Бір жыл ішінде 67-ден аса жауынгерлік қызметке түстім. Әскери қызмет мен үшін үлкен өмір мектебі болды. Мұндағы үлкен жетістіктерімнің бірі – жоғары оқу орнына білім гарантын иелену. Еліме оралған соң, жоғару оқу орнын аяқтап, шәкірт тәрбиелеп ұлағатты ұстаз болсам деген арманым бар», - деп әңгімесін аяқтады Мақсат.
Ефрейтор Қыдырбай Береке Қуанышбекұлы – 2 атқыштар ротасының сарбаз-атқышы. Қызылорда облысы, Жаңақорған ауданы, Қыркеңсе аулында дүниеге келген нағыз қыр баласы – Береке ротада нағыз жанашырлықтың, қамқорлықтың, мейірімділіктің символы болды. Кез-келген адамнан көмегін аямайтын Береке қарулас достарының ортасында да беделді еді. Ауылдағы ағайынның арасындағы ауызбіршілік пен татулықты, бауырмашылдық пен бірлікті көріп өскен Береке осы тәрбиені өзі жүрген әскери ортада да жалғастырды. «Әскери тәртіп пен әскери қызмет бізді біраз жаман әдеттерден тыйылуға үйретті. Шынында біз жастар ғаламтордың шырмауында қалып барамыз, ондағы үйренетін жақсы нәрседен, жамандары көп. Әскери өмірде өзіме көңіл бөлдім, шынықтым, шыңдалдым, алдыма айқын мақсат қойдым, Отанымның, жаныма жақын жандардың амандығы мен үшін бәрінен қымбат. Әскерге алғаш келгенімде мені командирлерім сапқа тұрудан бастап, қару ұстауға, оны қолдан білуге, мұқияттылыққа, жауынгерлік қызметке қалай үйретсе, өзімнен кейін келген бауырларыма да, дәл солай үйретуге, қолдау көрсетуге тырыстым. Өз заманында «Біріңді қазақ біріңді дос, көрмесең істің бәрі бос» деген Абай бабамыздың дана сөзі бізге арналғандай көрінеді. Менің өмірлік ұстанымым – әр қазақ менің жалғызым»,- дейді Береке. Ия, қамқорлық, жанашырлық аңғалдық сияқты адам жанының асыл қасиеттері Берекенің бір бойынан табылары сөзсіз. Мұндай жауынгердің рухы да биік болары анық.
Әскери бөлімнің әскери қалашығын, ондағы қоймалар мен ғимараттарды күзететін ішкі қарауыл қызметін орындайтын атқыштар взводында жауынгерлік қызмет атқаратын ефрейтор Ерғалиев Данияр Ерғалиұлы жауынгерлік қызметтің үздігі.
Данияр Қызылорда облысы, Қармақшы ауданы Төретам кентінде туған. Отбасының кенжесі Даниярдың еркелігі басым болды. Байқоңыр ғарыш айлағында қызмет атқаратын әкесі Ерғали Даниярдың бетінен қақпады. Үлкен ұлдары мен қыздарының жоғары оқу орындарын аяқтап, қызметке орналасуына жағдай жасаған әкесі Даниярдың да оқуға баруын қалады. 9 сыныпты аяқтаған соң Қызылорда аграрлық-техникалық колледжіне оқуға түсіп, автомеханик мамандығын алып шығады. 2023 жылы күзгі шақырылымға ілініп, желтоқсан айында әскер қатарына алынады. Қашанда кез-келген істі әкесімен ақылдасатын Данияр әскерге кететіні туралы алғаш әкесіне жеткізді. Осылайша ата-анасының ақ батасымен Отан қорғауға аттанған Данияр түзу жолдан таймады. Әскери қызметтің қыр-сырын жетік меңгерді. Ішкі қарауыл бойынша жауынгерлік қызметті тәжірибесі мол сержанттармен бірдей атқарып жүрді. Қасындағы қарулас достарынан қарауыл қызметін атқару кезінде көмегін аямады. Атқыштар взводының командирі лейтенант Мелдебек Әділжан: «Даниярдың кез-келген істе көзсіз батырлығы мені таң қалдырады, оның бойында қайтпас қайсарлық, жасымайтын бірбеткей тік мінезі, өзіне нық сенімділік сияқты ер жігітке тән өте жақсы қасиеттер бар. 1 жыл бойы атқарған жауынгерлік қызметінде ешқандай ескерту алған емес, менің, сержанттарымның көмекшісі. Сарбаздарды жауынгерлік қызметке бөлгенде саналы ойларымен бөлісіп, оларға жігер беріп отырады. Жауынгерлік қызметте орындалатын міндеттерді, іс-әрекетті жатқа біледі, жетік орындайды. Осындай сарбаздарымның барлығымен мақтанамын»,- дейді. «Жақында ғана Алматы қаласындағы «Логистика және көлік академиясына» оқу грантын жеңіп алдым. Бұл қуанышымды бірінші әкеме айттым. Маған осындай мүмкіндік сыйлаған командирлеріме алғыс айтамын. Мен Ұлттық ұлан қатарында әскери борышымды атқарғанымды мақтан етемін»,- дейді Данияр.
Ефрейтор Айдаров Анаят Айдарұлы – 1 атқыштар ротасының сарбаз – атқышы. Тактикалық атыс дайындығының, қарумен атудың, сарбаздар арасында 100 метрге жүгірудің үздігі.
Ленгер қаласында ұйымдастырылған оқу пунктінде жүріп-ақ өзін барлық жағынан жақсы көрсете білген жауынгер бірден бәрінің көзіне түсті. Көп сөйлемейтін, тұйықтау, салмақты мінезі бар Анаяттың шапшаңдығы, шымырлығы, алғырлығы оны үнемі үздіктер қатарынан көрсетіп жүрді.
«Менің әскерге келуім қызық болды»,- деп бастады әңгімесін Айдар. «11-сыныпты бітірген соң сауда орындарында сатушы боп жұмыс істей бастадым. Әдеттегідей досым екеуміз жұмыстан келе жатқанбыз, бізді әскери формадағы кісілер тоқтатып аты-жөнімізді, ЖСН сұрады. Алғашында қандай да бір бұзушылық жасадық па деп, сескеніп қалдық. Кейін біздің әскерге баруымыз үшін шақырту беріп, арнайы мекемеге шақырды. Барған соң, құжаттарымды толтырып, әскерге баратыным туралы айтты. Осылайша 23 желтоқсанда Шымкент қаласына жол тарттық. Мен бала кезімнен спортты жақсы көретінмін, әрқашан жаттығуды кейінге қалдырмайтынмын. Әскерде осы әдетімді жалғастырдым. Менің үздіктер қатарында болуыма үлкен әсер етті. Әскери қызметте маған қиындау болғаны 3 сағат сақшы болып постта тұру еді, бірақ командирлерімнің арқасында тез үйреніп кеттім. Өзіңе артылған міндетті, жауапкершілікті саналы түрде түсіне білсең, жауынгерлік қызметті атқару оңай болады екен»,- дейді.
Алматы қаласындағы Қ. Сәтпаев атындағы Қазақ Ұлттық техникалық университетіне білім грантын жеңіп алған Анаят болашақта мықты кәсіпкер болғысы келетінін айтты.
Әрбір елдің айбынын асқақтатып тұратын ұлы күші – әскері. Қазіргідей алмағайып кезеңде маңыздысы - әскеріміздің қуатты болуы. Еліміздің қорғанысын күшейтуге дамыған үлгідегі қару-жарақ, техника, әскерді басқарудағы жаңа әдістер аздық етеді. Мұндағы ең айбынды қуатты күш – мықты жауынгерлеріміз. Ендеше әскеріміздің берік тірегі – сарбаздарымыз аман болсын!
6698 әскери бөлімі
капитан Шынжигитова Малика
