ҚР Қарулы күштерінің Ұлттық әскери-патриоттық орталығы бұрынғы гарнизондағы Офицерлер үйінің базасында құрылды, деп хабарлайды DKnews.kz.
Филиалдың салтанатты ашылу рәсіміне Қарулы күштердің әскери қызметшілері, ардагерлері, орталық қызметкерлері мен «Жас сарбаз» балалар-жасөспірімдер қозғалысының тәрбиеленушілері қатысты.
Ұлттық әскери-патриоттық орталықтың бастығы Қазақстанның еңбек сіңірген қайраткері Арман Асенов әріптестерін айтулы оқиғамен құттықтады.
Ол биылғы жылы барлық ірі гарнизондарда әскери қызметшілердің балаларымен әскери-патриоттық жұмысты ұйымдастыру бойынша толыққанды оркестрлері, ансамбльдері мен қызметтері бар филиалдар пайда болғанын атап өтті.
Армия ортасында патриоттық сана мен ынтымақты қалыптастыруда мәдениеттің алатын орны зор. Сондықтан біздің мәдени-демалыс алаңдарымызда жоғары дәрежелі мамандардың жұмыс істеуі маңызды Арман Асенов
Семейдегі ҰӘПО филиалының бастығы подполковник Нұрсұлтан Жұмағұлов жаңа орталық осындағы барды үйлестіру арқылы құрылғанын түсіндірді. Мұнда патриоттық жұмысты ұйымдастыру қызметі әскери қызметшілердің балаларына арнап өткізетін ән, би және домбыра үйірмелері жұмыс істейді, әскери оркестр мен эстрадалық би тобы да бар.
Іс-шараның маңызды сәті Қарулы күштер Ұлттық әскери-патриоттық орталығының Семей филиалы, Қасым Қайсенов атындағы 68303 әскери бөлімі және Шәкәрім атындағы №5 көпсалалы гимназия арасындағы ынтымақтастық туралы меморандумға қол қою болды. Құжат жастарды әскери-патриоттық тәрбиелеу ісіндегі күш-жігерді біріктіруге және бірлескен жобаларды іске асыруға бағытталған.
Шара соңы мерекелік концертпен аяқталды.
