Аты аңыз болған даңқты қаһарман, гвардия полковнигі Бауыржан Момышұлының 114 жылдығына орай Аягөз гарнизоны 10810 әскери бөлімінің сарбаздарымен "Бауыржан Момышұлы - батыр тұлға" атты ерлік сабағы ауған соғысы ардагерлерінің қатысуымен өтті, деп хабарлайды DKnews.kz.
Аталмыш шараның негізгі мақсаты оқушыларға соғыс қаһарманы Бауыржан Момышұлының ғасырдан ғасырға, ұрпақтан ұрпаққа өткен ерлігі туралы, қанатты сөздерімен таныстыру және Отанға деген патриоттық сезімін қалыптастыру болып табылады.
Кездесу барысында ауған соғысының ардагерлері Айтын Арқабаев пен Марат Құсайынов өзі әскерде қызмет еткен әр түрлі кезеңдер туралы айтып, халық қаһармандары өмірбаянының қызықты тұстарымен бөлісті. Сонымен қатар Бауыржан атамыз жайлы деректі фильмдер көрсетілді.
– Отанға қызмет ету үшін, ең алдымен, патриот болу керек. Өзіңмен тынымсыз жұмыс істеу, кәсіби шеберлікті арттыру және уақыт келгенде Отан алдындағы борышты абыроймен орындау қажет, – деді ауған соғысының ардагері Айтын Арқабаев.
Іс-шараның соңы 10810 әскери бөлімінің аумағында орналасқан Бауыржан Момышұлы монументіне гүл шоқтарын қою рәсімімен аяқталды. Адамзат тарихындағы сұм соғыста өрлік, қайсарлық пен өжеттіктің жарқын үлгісін көрсеткен аға ұрпақтың ерлік ісі – кейінгіге үлгі. Сондықтан бүгінгі ұрпақ оларды ерекше қастерлейді, ұлық тұтады. Даңқты ерлікке мәңгілік құрмет көрсетеді.
– Мұндай іс-шаралар еліміздің жауынгерлеріне құрмет көрсету, өскелең ұрпақтың ортасында Отанға деген сүйіспеншілік пен жауапкершілік сияқты қасиеттердің артуына ықпал ету үшін маңызды, – деп атап өтті гарнизон бастығы подполковник Дастан Мұхаметжанов.
