Шахмат пен британдық білімнің ортақ тұсы қандай? Екеуі де стратегиялық, абстрактылы шығармашылық ойлау қабілеті мен көшбасшылық қасиеттерді дамытуға бағытталған. Coventry University Kazakhstan мен Қазақстан шахмат федерациясы осы интеллектуалдық спорт түрін жаңа деңгейге көтеру мақсатында тиісті меморандумға қол қойды, деп хабарлайды DKnews.kz.
Меморандум аясында, Астанадағы тұңғыш Британ университеті мектеп оқушылары, студенттер мен кәсіби шахматшылар үшін тұрақты түрде шахмат турнирлерін өткізетін алаңға айналады. Бұған дейін, университет пен федерация ұйымдастырған байқауда, үздік нәтижелерімен көзге түскен жеңімпаз Coventry University Kazakhstan оқу орнының толық грант иеленген болатын. Бұл қадам шахматтың әлемдік деңгейде мойындалған сапалы білімге жол ашатынын дәлелдеді.
Қазақстанда шахмат көптен бері жай ғана ойын емес, маңызды спорт түріне айналғаны белгілі. Біз өз гроссмейстерлерімізді жақсы танимыз және жетістіктерін жоғары бағалаймыз, ал жас ұрпақ чемпиондарымыздың жеңістерінен шабыт алып, олардың ізін одан әрі жалғастыруда. Сондықтан біз осы ынтымақтастық арқылы шахмат ойынын жастардың күнделікті өміріне енгізіп, оларға жаңа мүмкіндіктер беруді көздеп отырмыз.
Қазақстан шахмат федерациясы аталған спорт түрін ел ішінде кеңінен насихаттап, мектеп оқушылары мен студенттерден бастап халықаралық деңгейдегі чемпиондарға дейінгі шахматшыларды дайындауда үлкен жұмыс атқарып келеді. Coventry University Kazakhstan оқу орнымен жасалған ынтымақтастық талантты жастарға жаңа мүмкіндіктер беріп, Қазақстанның шахмат саласында жетекші ел ретінде нығаюына септігін тигізері анық.
«Шахмат ойыны ойлануға, жоспарлауға және жеңіске жетуге үйретеді – бұл қасиеттер тек спортта ғана емес, өмірде де аса маңызды. Біз Coventry University Kazakhstan оқу орнында дарынды жастарға қолдау көрсетуге тырысамыз, олардың жан-жақты дамуына қажетті бірегей мүмкіндіктерді ұсына отырып, болашақ көшбасшыларды тәрбиелейміз. Қазақстан Шахмат Федерациясымен ынтымақтастығымыз – еліміздегі осы маңызды спорт түрі мен білім беру саласын дамытуға қосқан айрықша үлесіміз деп білеміз» Мирас Дәуленов, Coventry University Kazakhstan президенті
"Шахмат — жай ғана спорт түрі емес, ол жеке тұлғаны қалыптастыру құралы. Coventry University Kazakhstan оқу орнымен ынтымақтастық жастарға ерекше мүмкіндіктер ашып, интеллектуалдық спортты әлемдік деңгейдегі біліммен ұштастыратыны белгілі. Біз мұндай жобалардың болашаққа сеніммен қарайтын жаңа буын көшбасшыларын тәрбиелеуге үлкен септігін тигізетініне сенімдіміз" Дәрмен Сәдуақасов, Қазақстан шахмат федерациясының бірінші вице-президенті
