Абай гарнизонында «Шығыс» өңірлік қолбасшылығына қарасты 54770 әскери бөлімінің құрылған күніне арналған салтанатты жиын өтті. Ұлттық әскери-патриоттық орталығы Семей филиалында ұйымдастырылған мерекелік концертке «Шығыс» өңірлік қолбасшылығы әскерлер қолбасшысының орынбасары полковник Дархан Ажибаев, гарнизонның әскери бөлімдерінің командирлері, Қарулы Күштердің ардагерлері, әскери қызметшілер мен олардың отбасы мүшелері қатысты, деп хабарлайды DKnews.kz.
Әскери бөлімнің 52 жылдығына арналған салтанатты жиын сахна төріне Жауынгерлік Туды алып шығудан басталды. Кейін әскери оркестрінің орындауында мемлекеттік Әнұран шырқалды. Ал «Шығыс» өңірлік қолбасшылығы әскерлер қолбасшысының орынбасары полковник Дархан Ажибаев пен бөлім командирі, подполковник Қанат Тәңірбергенов жиналғандардың барлығын айтулы мерекемен құттықтады.
Кеш барасында өздеріне жүктелген міндеттерді мінсіз орындап, көрсеткен еңбектері үшін ерекше көзге түскен әскери қызметшілер марапатталды. Сәйкесінше үздік деп танылған бірқатар офицерлер, сержанттар мен сарбаздар алғыс хаттармен және құттықтау грамоталарымен және бағалы сыйлықтармен марапатталды.
«Шығыс» өңірлік қолбасшылығы әскерлер қолбасшысының орынбасары полковник Дархан Ажибаев әскери бөлім қызметкерлеріне ризашылығын білдіріп, олардың қиын істеріне сәттілік тіледі. Іс-шара барысында сахна төріндегі экранынан әскери бөлімнің жетістіктері туралы бейнефильм көрсетілді. Айта кетейік, қазіргі уақытта әскери бөлім жауынгерлік дайындықтан өзге ел аумағында орын алатын әртүрлі апаттарда аянбай еңбек етіп келеді. Атап айтқанда, әр жылдары орын алған орман өрттері мен елдімекендерді су басу жағдайларына белсенді түрде қатысуда.
Мерекелік кеш көрермендерге ұмытылмас сәттер сыйлап қана қоймай әскери қызметшілер мен олардың отбасыларының рухын көтергені анық.
