13 мыңнан астам халқы бар Приозерск қаласында осы уақытқа дейін Мәдениет үйі болмаған. Тұрғындар көп жылдар бойы МҮ үшін үй-жай бөлуді сұрады. Енді бұл мәселе шешілді: бұрынғы Офицерлер үйінің ғимараты қалаға беріледі, деп хабарлайды DKnews.kz.
ҚР Қорғаныс министрлігімен келіссөздер жүргізілді, нысанды Приозерск қаласының коммуналдық меншігіне беру туралы уағдаластыққа қол жеткізілді. Қазіргі уақытта жер учаскесін бөлу және техникалық құжаттаманы дайындау бойынша жұмыстар жүргізілуде.
– Ғимарат апат алдындағы жағдайда және күрделі жөндеуді қажет етеді. Барлық құжаттарды рәсімдеп, қала балансына бергеннен кейін біз қайта қалпына келтіруді бастаймыз. Екі жылдың ішінде бұл мәселені толығымен шешеміз деп ойлаймын, – деп атап өтті Приозерск әкімі Мансұр Ахметов Өңірлік коммуникациялар қызметінде өткен брифингте.
Бірақ бұл қалаға қатысты жалғыз маңызды жаңалық емес. Сәуір айында 210 орындық заманауи дене шынықтыру-сауықтыру кешенінің құрылысы аяқталуы тиіс, сондай-ақ жақын арада 320 орындық балабақша құрылысын қаржыландыру күтілуде.
Мансұр Ахметов атап өткендей, биыл Приозерск қаласын дамыту үшін көп жұмыс жасалатын болады. Атап айтқанда, ұзындығы 1,86 км жылумен жабдықтаудың инженерлік желілерін ағымдағы жөндеу жоспарланған. 2025-2026 жылдардағы жылыту маусымын үздіксіз өткізу үшін қуаты 1 МВт дизельді генератор сатып алынады. Сондай-ақ, № 2 су жинағыштың шатырын, ғимаратын және жабдықтарын жөндеу жоспарланған.
Қалада әлеуметтік осал топтарының тұрғын үй жағдайларын жақсартуға ерекше көңіл бөлінеді. Биыл жергілікті билік төрт қабатты үйді жөндеумен айналысатын кәсіпкерден 20-ға жуық пәтер алуды жоспарлап отыр.
Сондай-ақ, Б. Момышұлы көшесіндегі екі үй күрделі жөндеуден өтеді. Жобалық-сметалық құжаттама әзірленді.
Бұл жобалардың барлығы қала тұрғындарының өмір сүру сапасын арттыруға бағытталған.
