Қанат Бозымбаев Қарағанды облысының көктемгі су тасқынына дайындығын тексерді, деп хабарлайды DKnews.kz.
Жұмыс сапары барысында вице-премьер су тасқыны қаупі бар аумақтарды аралады. Бұқар Жырау, Шет және Абай аудандарының елді мекендері, сондай-ақ Нұра және Шерубай-Нұра өзендерінің арналары, Самарқанд және Шерубай-Нұра су қоймалары зерттелді.
Өңірде су тасқынына қарсы 180 іс-шара өткізілді. 65 км қорғаныс бөгеттері мен біліктері тұрғызылып, нығайтылды, өзендер арналарының 18 км астам су тасқыны қаупі бар учаскелеріне санация жүргізілді, 26 км дренаждық және су бұру жүйелері тазартылды. Автомобиль жолдарының 75 учаскесінде су өткізу қабілеті артты.
Облыс бойынша су тасқыны қаупі жоғары 150 елді мекен ерекше бақылауға алынды. 217 су шаруашылығы құрылыстары бақылауда.
Аймақ бойынша жағдай тұрақты, өзендер қысқы режимде, су деңгейінің төмендігі және судың аздығы байқалады. 1 наурыздан бастап жағдайды бақылау үшін жоғары дайындық режимі енгізіледі.
«Қазгидромет» РМК болжамына сәйкес, көктем ерте келіп, күн күрт жылынады деп күтілуде. Біз ТЖ министрі Шыңғыс Әріновпен бірге су тасқыны қаупі бар өңірлерді аралауды бастаймыз. Бұл жұмыс Қарағанды облысынан басталды. Су тасқыны қаупі бар бірқатар елді мекендерге бардық. Бұқар Жырау және Қарқаралы аудандарында қар деңгейі нормадан жоғары. Шет ауданына келетін болсақ, қар нормадан төмен, ылғал қоры да қалыпты деңгейде. Топырақтың қатуы өткен жылмен салыстырғанда төмен. Осы жерде қажетті жұмыстардың жүргізілгендігіне көз жеткіздік. Бірақ дайын болу керек. Болжам бойынша жауын-шашын көп түсіп, күннің жылынуы күтілуде» Қанат Бозымбаев
Қарағанды облысының әкімдігіне жағдайды күнделікті бақылау және барлық күш пен техниканы дайындыққа келтіру тапсырылды.
