2025 жылғы 1 ақпандағы жағдай бойынша Қазақстан Республикасының сақтандыру секторында 25 сақтандыру ұйымы бар, оның 10-ы – өмірді сақтандыру бойынша, деп хабарлайды DKnews.kz.
2025 жылғы қаңтардың қорытындысы бойынша сақтандыру (қайта сақтандыру) ұйымдарының активтері 2,5%-ға 3,2 трлн теңгеге ұлғайды, ол негізінен сақтандыру қызметі бойынша кірістердің өсуі есебінен болды.
2025 жылғы 1 ақпанда активтер құрылымында ең көп үлес бағалы қағаздарға – 74,0% (2,4 трлн теңге), екінші деңгейдегі банктердегі ақшалай қаражат пен салымдарға – 5,5% (177 млрд теңге), сақтандыру дебиторлық берешекке – 4,9% (157 млрд теңге) тиесілі.
Сақтандыру (қайта сақтандыру) ұйымдарының міндеттемелері негізінен сақтандыру резервтерінің өсуі есебінен 2025 жылғы қаңтарда 2,9%-ға 2,2 трлн теңгеге дейін ұлғайды.
Сақтандыру (қайта сақтандыру) ұйымдарының меншікті капиталы негізінен сақтандыру қызметінен алынған пайда есебінен 2025 жылғы қаңтарда 1,6%-ға немесе 15,6 млрд теңгеге 961 млрд теңгеге дейін ұлғайды.
2025 жылғы қаңтарда сақтандыру нарығы бойынша таза пайда сақтандыру және инвестициялық қызметтен алынған кірістер есебінен 3,0 млрд теңге болды.
2025 жылғы қаңтарда жеке және заңды тұлғалар бойынша жасалған сақтандыру шарттарының саны 1 987 мың шартты құрады, бұл 2024 жылдың осындай кезеңімен салыстырғанда 40,4%-ға көп. Негізгі өсім жазатайым оқиғалардан сақтандыру (649 мың шарт немесе 169,9%) бойынша шарттарға тиесілі.
Сақтандыру (қайта сақтандыру) шарттары бойынша қабылданған сақтандыру сыйлықақылары 2025 жылғы қаңтарда 154,8 млрд теңгені құрады, бұл 2024 жылдың осындай кезеңімен салыстырғанда 10,4%-ға көп. Сақтандыру сыйлықақыларының өсуінің негізгі драйвері ерікті жеке сақтандыру сыныбы болып табылады.
Міндетті сақтандыру бойынша 2025 жылғы қаңтарда 20,4 млрд теңге сомаға сақтандыру сыйлықақылары жиналды, бұл өткен жылдың ұқсас кезеңімен салыстырғанда 24,7%-ға артық. Ұлғаю, негізінен, көлік құралдары иелерінің азаматтық-құқықтық жауапкершілігін сақтандыру бойынша сыйлықақыларды ұлғайту есебінен болды (30,3%-ға немесе 2,1 млрд теңгеге өсу) орын алды.
Ерікті жеке сақтандыру бойынша сақтандыру сыйлықақыларының көлемі 2025 жылғы қаңтарда 61,9 млрд теңгені құрады, бұл өткен жылдың ұқсас кезеңімен салыстырғанда 25,0%-ға көп. Өсу негізінен жазатайым оқиғалардан сақтандыру бойынша 3,1 есе немесе 13,1 млрд теңгеге және зейнетақы аннуитеттік сақтандыру бойынша 2,2 есе немесе 11,9 млрд теңгеге жиналған сыйлықақылар сомасының ұлғаюына байланысты.
Ерікті мүліктік сақтандыру бойынша сақтандыру сыйлықақылары ағымдағы жылдың қаңтар айында 72,5 млрд теңгені құрады, бұл өткен жылдың ұқсас кезеңімен салыстырғанда 2,6%-ға аз. Азаю мүлікті залалдан сақтандыру бойынша жиналған сыйлықақылар сомасының 7,7%-ға немесе 4,1 млрд теңгеге азаюына байланысты. Бұл ретте кәсіби жауапкершілікті сақтандыру сыныбы бойынша 2024 жылдың ұқсас кезеңімен салыстырғанда 3,2 млрд теңгеге өсу байқалады.
2025 жылғы қаңтарда сақтандыру төлемдері 32,4 млрд теңгені құрады, бұл өткен жылдың ұқсас кезеңімен салыстырғанда 60,1%-ға көп. Өсім, негізінен, қызметкерді жазатайым оқиғалардан міндетті сақтандыру және ерікті мүліктік сақтандыру бойынша сақтандыру төлемдерінің ұлғаюына байланысты.
2025 жылғы қаңтарда барлығы 149 мың төлем жүзеге асырылды.
