ТЖМ басшысы әмбебап құтқару бөлімшесін ашты, деп хабарлайды DKnews.kz.
Павлодар облысының Аққулы ауданындағы "Омбы-Майқапшағай" республикалық маңызы бар трассасында әмбебап құтқару бөлімшесінің ашылуы өтті. Салтанатты рәсімге Қазақстан Республикасының Төтенше жағдайлар министрі генерал-майор Шыңғыс Әрінов, сондай-ақ азаматтық қорғау органдарының ардагерлері мен құрметті қонақтар қатысты.
Павлодардан 100 км жерде орналасқан жаңа кешен еліміздегі осындай үшінші нысан. Оның бірегейлігі — бірнеше шұғыл қызметтердің бірге қызмет атқаруында, яғни бір аумақта өрт сөндіру бөлімі, ҚР ТЖМ Апаттар медицинасы орталығының трассалық медициналық-құтқару пункті, ал жақын арада облыстық ТЖД жедел-құтқару жасағының қызметкерлері жұмыс істей бастайды.
Осындай формат төтенше жағдайларға ден қою уақытын барынша қысқартуға мүмкіндік береді. Төтенше жағдайдың сипатына қарамастан, яғни өрт, ЖКО немесе шұғыл медициналық көмек болсын мамандар үйлесімді, жедел және тиімді әрекет етеді. Объектіні жаңарту бюджет қаражатынсыз жүзеге асырылды", -деп Шыңғыс Әрінов атап өтті.
"Өрт сөндірушілерді, құтқарушылар мен дәрігерлерді бір базада біріктіру-бұл жай ғана ыңғайлылық емес. Бұл төтенше жағдайда зардап шеккендерге алғашқы бірнеше минутта жедел көмек көрсетудің нақты мүмкіндігі. Біз мұндай кешендердің автожолдардың стратегиялық маңызды учаскелерінде болуы үшін жұмыс істеп жатырмыз", - деп министр Шыңғыс Әрінов атап өтті.
Орталықтың Аққулы ауданында орналасуы оның стратегиялық маңыздылығын ескере отырып таңдалады. Ол Павлодар облысының аумағын ғана емес, "Семей-Орманын"қоса алғанда, резерваттар мен жетуі қиын учаскелерге дейінгі тыс жерлерде де көмек көрсетуге мүмкіндік береді.
Кешен ТЖ салдарын жою үшін қажетті заманауи техникамен және жабдықтармен жарақталған. Оның аумағында зардап шеккендерді шұғыл эвакуациялау және құтқару топтарын шалғай аудандарға жедел тасымалдау үшін тікұшақ алаңы қарастырылған.
Жеке құрам үшін қолайлы жағдайлар жасалған: екі қабатты ғимаратта тәулік бойы мамандар кезекшілік етеді, демалуға арналған бөлмелер, душ бөлмелері, ас үй, сондай-ақ арнайы техникаға қызмет көрсету үшін техникалық аймақтар қарастырылған.
Бұған дейін мұндай кешендер Ақмола және Қарағанды облыстарында пайдалануға берілген болатын.
Іс-шара соңында ТЖМ басшысы қызметкерлерге жаңа арнайы техниканың кілттерін, алғыс хаттарды табыс етті. Сондай-ақ ТЖД-ның бірнеше қызметкердің кәсібилігі мен адалдығын атап өтіп, оларға кезектен тыс шендер берді.
Қазақстан ТЖМ қызметкерлердің жеделдігі мен жоғары даярлығына баса назар аудара отырып, өзінің инфрақұрылымын нығайтуды жалғастыруда, өйткені азаматтардың қауіпсіздігі ведомствоның басты басымдығы болып қала береді.
