Денсаулық сақтау министрлігінде ДДҰ мен Қазақстанның 2030 жылға дейінгі ынтымақтастығының елдік стратегиясының жобасы талқыланды, деп хабарлайды DKnews.kz.
Құжатты талқылауға ведомство басшысы Ақмарал Әлназарова, ДДҰ-ның ҚР-дағы Тұрақты Өкілі Скендер Сыла, ДДҰ-ның Алматы қаласындағы МСАК жөніндегі еуропалық орталығының басшысы Мелита Якаб және ДДҰ Қоғамдық денсаулық сақтау бағдарламаларының ұлттық үйлестірушісі Лаура Өтемісова қатысты.
Елдік стратегия ДДҰ-ның Жалпы жұмыс бағдарламасына және еуропалық жұмыс бағдарламасына сәйкес денсаулық сақтау саласындағы нәтижелерді жақсартуды және денсаулық сақтау жүйелерін нығайтуды қамтамасыз ете отырып, Қазақстанның денсаулық сақтау саясаты мен даму мақсаттарын қолдау үшін әзірленген.
Министр бұған дейін ДДҰ-ның 2028 жылға дейінгі он төртінші жалпы жұмыс бағдарламасының шеңберінде алты стратегиялық басымдық келісілгенін атап өтті. Олар климаттың өзгеруіне ден қою шараларына, денсаулықтың бұзылуының негізгі себептеріне, МСАК-тың прогрессивті тәсілдерін ілгерілетуге, денсаулық сақтау және қаржылық қорғау қызметтерімен қамтуды кеңейтуге, денсаулық үшін қауіптерді азайтуға, денсаулық сақтау саласындағы ТЖ-ға ден қою шараларына қатысты.
Ұсынылған стратегияда одан әрі ынтымақтастықтың негізі ретінде семіздік пен тамақтану проблемаларына қарсы күрес жөніндегі бағдарламаларды кеңейту, денсаулық сақтау қызметтерін цифрландыруды ілгерілету, аналар мен жаңа туған нәрестелер үшін медициналық көмекке қолжетімділікті жақсарту сияқты бағыттар алынды.
Кездесу барысында тараптар белсенді пікір алмасты, ұсыныстар мен ұсынымдарды тыңдады және бірлескен күш-жігермен құжаттың соңғы нұсқасын бекітуге келісті.
Елдік ынтымақтастық стратегиясына қол қою Астанада ДДҰ Еуропалық өңірлік бюросының директоры Ханс Клюге мырзаның қатысуымен ТМҰ-ға қатысушы елдердің денсаулық сақтау министрлерінің 5-ші кездесуі шеңберінде болжанады.
