Атырау облысының Миялы ауданында көктемгі су тасқынына қарсы алдын алу жұмыстары қарқынды жүргізілуде, деп хабарлайды DKnews.kz.
Бүгін аталмыш ауданға Ұлттық ұланның “Батыс” өңірлік қолбасшылығына қарасты 5546 әскери бөлімінің 60-қа жуық сарбазы табиғи апаттың салдарын болдырмау мақсатында төтенше шараларға жұмылдырылды.
Қазіргі уақытта құқықтық тәртіп әскері қаптарға құм толтырып, су басу қаупі жоғары аймақтарға жеткізу үшін дайындық жұмыстарын жүргізуде.
Бұл іс-шара өзендер мен су арналарының деңгейі көтерілуіне байланысты су тасқынының алдын алуға бағытталған.
Айта кету керек, су тасқынына қарсы іс-шараларға жұмылдырылған әскери қызметшілер барлық қажетті керек-жарақтармен, жылы киімдермен, сондай-ақ қосымша түскі және кешкі аспен қамтамасыз етілген.
