Шегірткеге қарсы күрес шараларына белсенді дайындық жалғасуда, деп хабарлайды DKnews.kz.
Ауыл шаруашылығы вице-министрі Бағлан Бекбауов шегіртке зиянкестеріне қарсы күрес шараларын ұйымдастыру және үйлестіру жөніндегі республикалық штабтың отырысын өткізді.
Оған Агроөнеркәсіптік кешендегі мемлекеттік инспекция комитетінің өкілдері, облыс әкімдерінің орынбасарлары, комитеттің аумақтық бөлімшелері мен ведомстволық бағынысты ұйымдардың басшылары қатысты.
2025 жылы шегіртке зиянкестерінің таралуы 2,1 миллион гектар аумақты қамтиды деп күтілуде, бұл өткен жылмен салыстырғанда 1 миллион гектарға аз. Шегірткеден қорғау шараларын жүргізуге республикалық бюджеттен 7,1 млрд.теңге бөлінді. Осы қаражат аясында 38 миллион гектар жерге зерттеу жұмыстарын жүргізу жоспарлануда. Жұмысқа 4342 адам тартылады, бұл өткен жылмен салыстырғанда екі есеге көп.
Қазіргі уақытта кешенді қызметтерді сатып алу жүргізілуде, мердігерлермен келісім-шарттар жасалды, өңдеуге 443 бірлік бүріккіш техника тартылады.
Шегірткелердің ең көп таралуы байқалатын өңірлерде жергілікті жерлерде жұмысты үйлестіру үшін облыс әкімдерінің орынбасарларының жетекшілігімен жедел штабтар құрылды.
Шегіртке зиянкестеріне қарсы қорғау шараларын тиімді ұйымдастыру үшін іс-шаралар жоспары мен жол картасы әзірленді.
Қазіргі таңда Түркістан және Жамбыл облыстарында шегірткемен күресу бойынша дайындық жұмыстары басталып кетті.
Марокко шегірткелерінің дернәсілдеріне мониторингтік зерттеулер жүргізу үшін Түркістан облысына Ақмола, Павлодар, Солтүстік Қазақстан, Қостанай, Қарағанды және Абай облыстарынан мамандар жіберіледі. Өңірлерге барлығы 12 көлік жүргізушілері мен 20 аудандық бөлімшелердің басшылары мен мамандары жіберіледі.
2025 жылы шегірткеге қарсы күрес шаралары барлық мүдделі тараптардың барынша үйлестіруімен жүзеге асырылады, бұл ауыл шаруашылығы алқаптарының зақымдану қаупін айтарлықтай төмендетеді және шегіртке зиянкестерімен күрестің тиімділігін арттырады.
