Қаржы нарығын реттеу және дамыту агенттігінің қаржылық тұрақтылықты қамтамасыз ету жөніндегі мақсаты басқа міндеттерге қарағанда басым мақсат ретінде тұжырымдалған, деп хабарлайды DKnews.kz.
Бұл нақтылау Агенттік Мемлекет басшысының тапсырмасы бойынша әзірлеген банктер және банк қызметі туралы жаңа заң жобасына енгізілді.
Басым мақсатты белгілеу қаржы реттеушісінің басымдықтары мен саясатына қатысты нарықтың күтулерін қалыптастыруға ықпал етеді. Бұл бастама сондай-ақ халықаралық тәжірибеге сәйкес келеді.
Сонымен бірге, қолданыстағы заңды тексеру барысында қайталанатын және ескірген нормалар алынып тасталды. Нормативтік база неғұрлым өзекті, ыңғайлы және қолжетімді форматқа ие болды. Жалпы баптардың бір бөлігі жаңа заң жобасынан шығарылды және қаржы нарығын мемлекеттік реттеу туралы заңда сақталды. Бұл тәсіл жаңа заңды жеңілдетуге және құқықтық базаны біріздендіруге мүмкіндік берді.
Жаңа заңның құрылымы банкті ашу және лицензиялау рәсімдерінен бастап банкті тарату рәсімдеріне дейін банктің өмірлік циклінің заңдылығына бағынады.
Қолданыстағы банктер және банк қызметі туралы заң 1995 жылы қабылданды. 30 жыл ішінде заңға көптеген өзгерістер енгізілді. Заңды қайта қарау қажеттілігі банк секторы үшін заманауи сын-қатерлер мен оның даму әлеуеті ескеріле отырып пайда болды.
Жаңа заң Мемлекет басшысының тапсырмасына сәйкес экономикалық белсенділікті ынталандыру және қаржы технологиялық сектордың бұдан әрі серпінді дамуының өзекті міндеттеріне жауап беретін болады.
