«Батыс» өңірлік қолбасшылығының теңіз жаяу әскері бригадасының спорт залында Қазақстан Республикасы Әскери полициясының құрылғанына 28 жыл толуына орай тартысты кіші-футбол турнирі өтті. Іс-шараға Ақтау гарнизонының барлық әскери бөлімдерінен 16 команда мен 100-ден астам әскери қызметші қатысты, деп хабарлайды DKnews.kz.
Турнирдің шымылдығы салтанатты сап түзеумен, Ақтау өңірлік гарнизоны әскери полициясының бастығы Сәкен Әулбековтың құттықтау сөзімен ашылды. Өз сөзінде ол мұндай іс-шаралардың жауынгерлік бауырластықты нығайту мен әскери қызметшілер арасында салауатты өмір салтын насихаттаудағы маңыздылығын атап өтті.
«Байқау жоғары деңгейде өтеді деп сенемін. Барлық қатысушыларға сәттілік тілеймін. Бұл турнирдің басты мақсаты – әскери бөлімдер мен құрылымдар арасындағы ұжымдық бірлікті арттыру. Ең бастысы – әскери қызметшілердің салауатты өмір салтын ұстануы. Ең мықтысы жеңсін!», - деді Сәкен Әулбеков.
Командалар жоғары дайындық деңгейін, жеңіске деген жігер мен нағыз спорттық төзімділік көрсетті.
Турнир қорытындысы бойынша:
- 1-орынды Қазақстан Республикасы Ұлттық ұланының 6656 әскери бөлімінің командасы иеленіп, үздік үйлесімділік пен тактикалық шеберліктерін көрсетті.
- 2-орын турнир иелері — теңіз жаяу әскері бригадасының командасына бұйырды.
- 3-орынды Қарақия шекара қызметі бөлімшесінің командасы жеңіп алып, жауынгерлік мінез бен табандылық танытты.
Жеңімпаздар мен жүлдегерлер салтанатты түрде алғыс хатпен, медальдармен, естелік сыйлықтармен және кубоктармен марапатталды
