Петропавл қаласында Солтүстік Қазақстан облысында су тасқыны салдарын жоюға және су тасқынына қарсы жұмыстарға қатысып, аяқтаған Қазақстан ТЖМ құтқарушылары мен әскери қызметшілерін салтанатты шығарып салу рәсімі өтті, деп хабарлайды DKnews.kz.
Өңірдегі су тасқыны жағдайының ең шиеленіскен кезеңінің аяқталғанын білдіретін рәсім ҚР Төтенше жағдайлар министрі генерал-майор Шыңғыс Әрінов пен облыс әкімі Ғауез Нұрмұхамбетовтың қатысуымен өтті.
Астана, Ақмола, Қостанай және Қарағанды облыстарының ТЖД, Азаматтық қорғау академиясы мен ҚР ТЖМ 28237 әскери бөлімінен келген құтқарушылар топтары өз базаларына оралды. Бұл күштер су тасқынының шарықтау шегінде СҚО-ға жедел жіберілген.
Су тасқынының белсенді кезеңінде жұмыстар ТЖМ басшысының тікелей үйлестіруімен жүргізілді, бұл іс-қимылдардың үйлесімділігі мен қауіп-қатерлерге жедел әрекет етуді қамтамасыз етуге мүмкіндік берді.
«Сіздер борыштарыңызды абыроймен атқарып, ерлік, төзімділік және жоғары кәсібилік көрсеттіңіздер. Күн демей, түн демей, тәулік бойы, ауа райы күрт өзгеріп, дауыл көтеріліп, тіпті бұршақ астында да жұмыстар бір сәтке де тоқтаған жоқ. Сол арқылы сіздер ауыр зардаптардың алдын алып, адамдардың өмірін сақтап қалдыңыздар», - деп министр операцияға қатысушыларға айтты.
Су тасқыны кезінде Қызылжар ауданы мен Петропавл маңындағы ауылдарда қапшықтарды төсеу және қорғаныс құрылыстарын нығайту бойынша тәулік бойы жұмыстар жүргізілді. Ущева мен Кожевенный ауылы маңындағы бөгеттерді қайта жаңарту су басу қаупін жоюға мүмкіндік берді.
Су тасқыны толық аяқталғанға дейін өңірде СҚО ТЖД күштері, сондай-ақ Қарағанды облысынан келген ҚР ТЖМ 52859 әскери бөлімінің әскери қызметшілері су тасқыны жағдайын бақылап, қажет болған жағдайда жедел әрекет етуге дайындықты қамтамасыз етіп, қызмет атқаруды жалғастырады.
ТЖМ басшысы волонтерларға, әкімдікке, Қорғаныс және Ішкі істер министрліктеріне, сондай-ақ бизнес өкілдеріне бірлескен күш-жігері мен үйлесімді жұмыстары үшін алғысын білдірді.
Рәсім аяқталғаннан кейін су тасқынына қарсы іс-шараларға қатысушылар ведомстволық наградалармен және алғыс хаттармен марапатталды.
