БАӘ-нің тақ мұрагерінің Қазақстан Республикасына ресми сапары аясында Қазақстан Республикасының Сауда және интеграция министрі Арман Шаққалиев және Ауыл шаруашылығы министрі Айдарбек Сапаров Парсы шығанағы елдерінде, соның ішінде БАӘ, Сауд Арабиясы және Катарда жетекші ритейлерлердің бірі болып саналатын LuLu компаниясының директорлар кеңесінің төрағасы Юсуф Әли Мусалиам Виттил Абдул Кадермен кездесті, деп хабарлайды DKnews.kz.
Әлем бойынша 280-нен астам гипермаркеттер желісін басқаратын LuLu компаниясы қазақстандық өндірушілермен бірлескен жобаларды іске асыруға қызығушылық танытты. Келіссөздер барысында Қазақстаннан сиыр еті, қой еті, құс еті, жұмыртқа, сүт өнімдері және астық сияқты ауыл шаруашылығы өнімдерінің кең ауқымын экспорттау, сонымен қатар жемістерді өңдеу мен ет өнімдерін өндіру перспективалары талқыланды.
Қазақстан тарапынан LuLu компаниясына Қазақстан аумағында өз логистикалық орталығын, сондай-ақ өнімді сұрыптап, қаптап, экспорттық партиялар дайындайтын орталық ашу мүмкіндігін қарастыру ұсынылды. Мұндай хаб компанияға өнімді тиімді түрде жинап, Парсы шығанағы елдеріне және басқа шетелдік нарықтарға жөнелтуге мүмкіндік береді.
Министрлер бұл жобаны іске қосуға жан-жақты қолдау көрсетуге дайын екендерін атап өтті, оның ішінде тиісті инфрақұрылымды, логистиканы таңдауға және мемлекеттік органдар тарапынан тиісті көмек көрсетуге дайын екендіктерін жеткізді.
Қазақстан LuLu компаниясымен ынтымақтастықты экспорттық әлеуетті арттыру және отандық өнімнің халықаралық нарықтарда кеңінен ұсынылуын қамтамасыз ету жолындағы маңызды қадам ретінде қарастырады.
Қазақстан тарапынан бұл бастамаға қолдау білдіріліп, республиканың экспорттық әлеуетін нығайту мен отандық өнімді шетелдік нарықтарға ілгерілетуге бағытталған LuLu компаниясымен одан әрі практикалық ынтымақтастыққа дайын екені жеткізілді.
