Астанада Сарайшық шағын ауданында балалардың терезеден құлау жағдайының алдын алу мақсатында профилактикалық акция ұйымдастырылды, деп хабарлайды DKnews.kz.
Шараны қалалық Төтенше жағдайлар департаменті, жергілікті атқарушы органдар мен мәслихат депутаттары өткізді, деп хабарлайды қала әкімдігінің ресми сайты.
Акцияға ата-аналар, меншік иелері бірлестігінің (МИБ) өкілдері мен жедел қызмет мамандары қатысты.
Сарайшық ауданы ТЖ басқармасы бастығының орынбасары, азаматтық қорғау полковнигі Бақыт Қожакеев балалардың терезеден құлау мәселесі әлі де өзекті екенін атап өтті. Оның айтуынша, жыл сайын күн жылына бастағанда мұндай оқиғалар жиілей түседі. Балаларға тіпті бірнеше минутқа назардан тыс қалдыру қауіп төндіреді, әсіресе терезелер қорғаныс құрылғыларымен жабдықталмаған болса.
«Соңғы үш жылда Астанада балалардың терезеден құлауына қатысты шамамен 30 жағдай тіркелді, өкінішке қарай, кейбірі өліммен аяқталды», – деді ол.
Акция ата-аналар мен меншік иелері бірлестігі өкілдерінің хабардарлығын арттыруды көздейді. Қатысушылар жас және көпбалалы отбасылар көп тұратын көпқабатты үйлерді аралап, қауіпсіздік ережелерін түсіндіріп, терезе бекіткіштерін орнату қажеттігін айтты.
Қалалық мәслихат депутаты Мадина Әжікенова ата-аналарға балаларды қараусыз қалдырмау туралы маңызды үндеу жасады. Ол баланың қауіпсіздігі – ең алдымен ересектердің күнделікті жауапкершілігі екенін атап өтті.
«Москит торлары – қорғаныс құралы емес, олар тек жалған қауіпсіздік сезімін тудырады. Балалар әлемді қорқынышсыз зерттейді, ал қауіп-қатерді алдын ала болжау – ересектердің міндеті», – деді ол.
Шара барысында ұйымдастырушылар көпбалалы отбасылардың бірінің үйінде терезе бекіткіштерін орнату тәртібін көрсетті. Бұл құрылғылар терезенің толық ашылуына жол бермейді және баланың құлау қаупін азайтады. Мұндай көмек қажет отбасылардың мекенжайы алдын ала анықталып, орнату ерікті түрде жүргізілді.
Акция аясында ТЖД өкілдері ата-аналармен профилактикалық әңгіме өткізіп, қауіптің алдын алу бойынша негізгі ережелер жазылған ақпараттық парақшалар таратты.
