Қанат Бозымбаев Таразда облыстар және Шымкент қаласының әкімдерімен оңтүстік өңірлердің дамуын талқылады, деп хабарлайды DKnews.kz.
Қанат Бозымбаев жұмыс сапарымен Жамбыл облысына барды. Премьер-министрдің орынбасары Тараз қаласында еліміздің оңтүстік өңірлерінің әлеуметтік-экономикалық дамуы және «Ауыл аманаты» жобасын іске асыру мәселелері бойынша кеңес өткізді.
Кеңеске Жамбыл облысының әкімі Ербол Қарашөкеев, Түркістан облысының әкімі Нұралхан Көшеров, Қызылорда облысының әкімі Нұрлыбек Нәлібаев, Шымкент қаласының әкімі Ғабит Сыздықбеков, сондай-ақ ұлттық экономика вице-министрі Бауыржан Омарбеков пен қаржы вице-министрі Абзал Бейсенбекұлы қатысты.
Әкімдіктерге жаңа Бюджет кодексі аясында Өңірлік стандарттар жүйесін ескере отырып, бюджеттік жоспарлау ережелері түсіндірілді.
2024 жылдың қорытындысы бойынша Өңірлік стандарттар жүйесі бойынша нысандармен және қызметтермен қамтамасыз ету деңгейі: Жамбыл облысында – 74,1% (ел бойынша 4-орын), Түркістан облысында – 66,3% (14-орын), Қызылорда облысында – 66,8% (6-орын), Шымкент қаласында – 87,9% (2-орын). Жалпы алғанда, барлық оңтүстік өңірлерде бұл көрсеткіш республикалық орташа деңгейден – 66,1% – жоғары.
Оңтүстік өңірлердегі экономикалық өсудің негізгі қозғаушы күші – ауыл шаруашылығы, шағын және орта бизнес. Бұл өңірлер азық-түлік өнімдерінің ірі өндірушілері және еліміздің азық-түлік қауіпсіздігін қамтамасыз етуге үлес қосып отыр. Дегенмен, өңірлер үшін негізгі мәселелердің бірі – инфрақұрылымды жаңғырту.
Кеңес барысында Қанат Бозымбаев инфрақұрылымдық жобаларды жоспарлау Өңірлік стандарттар жүйесінің көрсеткіштерін қатаң ескере отырып жүзеге асырылуы қажет екенін еске салды.
Өңірлік деңгейдегі теңгерім мен айырмашылықтарды азайту мақсатында вице-премьер әкімдіктерге Ұлттық экономика министрлігінің бюджеттік инвестициялық жобаларды басымдық бойынша іріктеу жөніндегі әдістемелік ұсынымдарын ескере отырып, артта қалған елді мекендерді бірінші кезекте қаржыландыру туралы шешім қабылдауды тапсырды.
«Ауыл аманаты» жобасы аясында Жамбыл облысында шамамен 10 мың жұмыс орнын құруды көздейтін болжамды инвестициялық жобалар, Қызылорда облысында 8 мың жұмыс орнын, Түркістан облысында 23 мың жұмыс орнын ашуға бағытталған жобалар қалыптастырылды. Қанат Бозымбаев олардың іске асырылуын жеделдетуді тапсырды. Ұлттық экономика министрлігіне Қаржы, Еңбек және халықты әлеуметтік қорғау министрліктерімен және облыс әкімдіктерімен бірлесе отырып, «Ауыл аманаты» жобасын қаржыландыру мәселесін пысықтауды тапсырды.
Сапар аясында Қанат Бозымбаев Қазақ ұлттық су шаруашылығы және мелиорация университетіне барып, оқу орнының оқытушыларымен кездесті. Кейін Тараз қаласындағы жаңа шағынаудандағы көпқабатты тұрғын үйлердің құрылысы және Түйте каналы жағалауын абаттандыру жұмыстарымен танысты.
