Шымкентте ҚР ІІМ Ұлттық ұланының 6506 және 6698 әскери бөлімдері ұйымдастырған Халықаралық балаларды қорғау күніне арналған мерекелік іс-шаралар өтті. Шаралар әскери бөлімдердің аумағында да, қалалық қоғамдық орындарда да өткізіліп, әскери қызметшілер мен олардың отбасыларына қуаныш пен бірлік атмосферасын сыйлады, деп хабарлайды DKnews.kz.
Шымкенттегі ең көне әскери бөлімнің бірі 6506 әскери бөлімі 1961 жылдан бері тәртіп пен қауіпсіздікті сақтауда. Бұл күні ол әскери қызметшілердің балаларына есігін айқара ашып, ойын-сауық бағдарламасын ұйымдастырды.
Бөлім аумағында анимациялық аймақтар қойылып, онда балалар байқауларға қатысып, мультфильм кейіпкерлерімен бірге билеп, ән айтты. Балалардың танымал әуендерін орындаған әскери оркестрдің қойылымы ерекше назар аударды, бұл барлық қатысушылар үшін мерекелік көңіл-күй сыйлады.
Сонымен қатар, балалар әскери техникамен және жабдықтармен танысып, естелік фотосуреттер түсіруге мүмкіндік алды. Мереке барлық кішкентай қонақтарға естелік сыйлықтар мен тәтті тағамдар табыстаумен аяқталды.
«Менің жас достарым, Сіздер тек ата-аналар үшін ғана емес, бүкіл ел үшін ең қымбатсыздар. Сіздер біздің болашағымыз, даңқты істеріміздің ізбасарларысыздар. Елдің болашағы Сіздерге байланысты. Осы айтулы мереке күні өздеріңізге денсаулық пен оқуда табыс тілеймін. Біздің Отанымыз - Қазақстан Республикасының лайықты азаматтары мен патриоттары болыңыздар» 6506 әскери бөлімі командирінің тәрбие және әлеуметтік-құқықтық жұмыстар жөніндегі орынбасары подполковник Бауыржан Шораев
Сонымен қатар, 6698 әскери бөлімі Шымкент қаласының Дендросаябағында мерекелік іс-шара ұйымдастырды. Мұнда әскери қызметшілердің балалары үшін түрлі ойындар, конкурстар мен шеберлік сыныптары дайындалды. Балалар спорттық жарыстарға қуана қатысып, сурет салып, ашық ауада ойнады.
Ұлттық ұланның әскери бөлімдерінде балаларды қорғау күнін мерекелеу отбасылық құндылықтар мен балаларға қамқорлық жасаудың маңыздылығын көрсететін жақсы дәстүрге айналды. Мұндай іс-шаралар әскери қызметшілер мен олардың отбасылары арасындағы байланысты нығайтуға, сондай-ақ қоғамда Ұлттық ұланның оң имиджін қалыптастыруға ықпал етеді.
