Халықаралық балаларды қорғау күні қарсаңында Қонаев гарнизонындағы 20030 әскери бөлімінде ашық есік күні ұйымдастырылды. Іс-шараны әскери бөлімнің жеке құрамы мен әскери полиция бөлімі бірлесіп өткізді, деп хабарлайды DKnews.kz.
Іс-шара қонақтары Қонаев қаласындағы қазақ орта мектебі-лицейінің шамамен 40 оқушысы, оның ішінде «Жас әскери полиция» арнайы сыныбының 20 оқушысы болды.
Оқушылар үшін мазмұнды әрі танымдық бағдарлама әзірленді. Олар Арнайы операциялар күштерінің қару-жарақ пен әскери техника үлгілерімен танысты. Бөлімнің саптық алаңында саптық дайындық пен қол күресі элементтері көрсетілген көрнекі жаттығулар өтті.
Сондай-ақ оқушылар оқу сыныптарын аралап, әскери қызметшілердің тұрмыстық жағдайларымен және жабдықтарымен танысты. Әскери қызметшілер бөлімдегі күнделікті өмір, әскери қызметтің ерекшеліктері және Отан қорғаушы мамандығының маңызы туралы айтып берді.
Оқушылар аса қызығушылықпен тыңдап, түрлі сұрақтар қойды. Ашық есік күні жас ұрпақтың әскери қызметке деген қызығушылығын оятуда маңызды қадам және есте қаларлық оқиға болды.
