Сенатор Ольга Булавкина Шығыс Қазақстан облыстық мәслихатының XXII кезекті сессиясына қатысты. Сессия жұмысына облыстық басқармалар мен департаменттердің басшылары, құқық қорғау органдарының өкілдері, қалалық және аудандық мәслихат депутаттары, қоғамдық ұйымдар мен БАҚ өкілдері, сондай-ақ қалалар мен аудандардың әкімдері онлайн форматта қатысты, деп хабарлайды DKnews.kz.
Сессияда сөз сөйлеген сенатор Сенат депутаттары мен жергілікті мәслихат өкілдері арасындағы тиімді өзара іс-қимылдың маңыздылығын атап өтті. Оның айтуынша, биліктің түрлі деңгейлерінің үйлесімді жұмысы орталық пен өңірлер арасындағы байланысты нығайтып, аумақтардың тұрақты және теңгерімді дамуын қамтамасыз етеді.
"Күшті өкілді билік халықпен тұрақты диалог орнатпайынша кері байланыс мүмкін емес. Сенат заң шығару бастамалары бойынша белсенді жұмыс жүргізіп келеді, бұл бастамалар, оның ішінде өңірлерден келіп түскен ұсыныстар мен өтініштер негізінде қалыптасады", – деді Ольга Булавкина.
Сенатор сондай-ақ Марқакөл ауданында болып, жергілікті халықпен, белсенділермен және мекеме өкілдерімен кездесу өткізді. Диалог барысында Ұранқай мен Марқакөл ауылдарының арасындағы жолды жөндеу, медициналық кадрлар мен дәрі-дәрмек тапшылығы, шекаралық аймақтардағы еңбекақы деңгейі, сондай-ақ жұмыспен қамту мен несиелеудің қолжетімділігі сияқты өткір мәселелер көтерілді.
Азаматтардың барлық өтініштері мен ұсыныстары жазылып алынып, әрі қарай жан-жақты зерделенетін болады. Сенатор олар салалық комитеттер мен атқарушы органдардың қатысуымен қаралатынын атап өтті.
