17 шілде күні дәрігерге шабуыл жасағаны үшін ұсталған күдіктіге қатысты бұлтартпау шарасы ретінде қамауға алу таңдалды, деп хабарлайды DKnews.kz.
Қазіргі уақытта ер адам тергеу изоляторына қамалды.
Тергеу нәтижелері бойынша заңнама аясында тиісті процессуалдық шешім қабылданатын болады. Ұсталған адамның әрекеті Қазақстан Республикасы Қылмыстық кодексінің 106-бабы — «Денсаулыққа қасақана ауыр зиян келтіру» бойынша саралануда.
Тергеу жалғасуда. Қазіргі уақытта барлық қажетті тергеу әрекеттері жүргізілуде.
Оқиға күрделі хирургиялық операция аяқталғаннан кейін Қостанай облыстық ауруханасының қабылдау бөлімінде орын алды. Урология бөлімінің хирургі Антон Кистанов науқастарды қабылдауды жалғастыру үшін төменге түскен болатын.
Кезекте тұрғандардың бірі еш себепсіз агрессия танытып, дәрігерге соққы жасаған. Салдарынан ол есінен танып қалған. Дәрігердің жағдайы өте ауыр: миға ауыр дәрежедегі соққы, миға қан құйылу және бас сүйегінің негізінің жабық сынығы анықталды.
Дәрігерлер консилиумынан кейін оны шұғыл түрде елордадағы мамандандырылған медициналық мекемеге көшіру туралы шешім қабылданды.
Ол жерде Ұлттық шұғыл медицинаны үйлестіру орталығында республикалық деңгейдегі жетекші мамандардың бақылауында жоғары мамандандырылған көмек көрсетілетін болады.
