KEGOC Қазақстанның энергетикалық қауіпсіздігін нығайту жоспарын ұсынды, деп хабарлайды DKnews.kz.
«KEGOC» АҚ ҚР Энергетика министрлігіне 2025 жылдың бірінші жартыжылдығындағы қызмет қорытындысы туралы есепті ұсынды. Компания Ұлттық электр желісінің өсіп келе жатқан сұраныс аясында тұрақты жұмыс істеп тұрғанын растады.
Тұрақты өндірістік көрсеткіштер компанияға инфрақұрылымды кең ауқымды жаңғыртуға бағытталған ұзақмерзімді стратегияны сенімді түрде іске асыруға мүмкіндік береді. Бұл стратегия елдің энергетикалық егемендігін нығайтып, экономикалық өсімді қолдауға бағытталған.
Есепті кезеңде елдегі электр энергиясын тұтыну 3%-ға өсіп, 61,8 млрд кВт⋅сағ-қа жетті. KEGOC жүйенің сенімді жұмысын қамтамасыз етіп, энергия тасымалдау көлемін 7,3%-ға арттырды. Алдағы жылыту маусымына дайындық аясында компания 577 нысанда жоспарлы жөндеу жұмыстарын жүргізуде.
Жартыжылдықтың тұрақты нәтижелері алдын ала шараларды іске асыруға берік негіз болады. Болжам бойынша, 2031 жылға қарай Қазақстанда электр қуатына деген сұраныс 4,8 ГВт-қа дейін артуы мүмкін.
ҚР Энергетика министрі Ерлан Ақкенженов жүйелік оператордың жұмысы ұлттық мақсаттарға қол жеткізудің негізі екенін атап өтті.
«Сенімді энергетикалық инфрақұрылым – бұл өнеркәсіптік саясат пен инвестициялық тартымдылықтың іргетасы. Мемлекет басшысының тапсырмасымен біз дәстүрлі генерацияны, жаңартылатын энергия көздері саласындағы ауқымды жобаларды және болашақ атом электр станциясын үйлестіре отырып, энергетиканы проактивті дамытуға көшіп жатырмыз. KEGOC-тың жұмысы – осы жоспардың өзегі. Бұл жобалар болашақ экономикамыздың қан тамыр жүйесін қалыптастырып, ұлттық энергетикалық жүйені нығайту бойынша аса маңызды міндеттерді шешеді» Ерлан Ақкенженов
Инфрақұрылымды ілгерілетіп дамыту үшін KEGOC бұрын-соңды болмаған инвестициялық бағдарламаны жүзеге асыруда. Қазақстанның Батыс аймағының энергия жүйесін Біртұтас электр энергетикалық жүйемен біріктіру жөніндегі тарихи жоба белсенді іске асырылуда. 600 км-ден асатын 500 кВ желі барлық өңірлерді алғаш рет біртұтас, неғұрлым орнықты және басқарылатын жүйеге біріктіреді.
Халқы тығыз орналасқан оңтүстік өңірлердегі желілерді жаңғырту «Солтүстік–Оңтүстік» транзитінің өткізу қабілетін 440 МВт-қа арттырады. Бұл өсіп келе жатқан сұранысты өтеу және жаңа электр станцияларын біріктіру үшін аса маңызды.
«Солтүстік–Оңтүстік» бағыты бойынша тұрақты ток желісінің құрылысы басталды. Бұл қуатты артерия болашақ атом электр станциясын және жаңартылатын энергия көздерінің ірі нысандарын біріктірудің негізі болады.
Астананы электрмен жабдықтау іркілістерінен қорғау мақсатында жаңа 500 кВ цифрлық қосалқы станциясы салынады. Ол елорда үшін екінші тәуелсіз қуат көзін қалыптастырады.
Ұзақмерзімді перспективада (2035 жылға дейін) KEGOC 17 000 км-ден астам электр жеткізу желілерін салуды және қайта жаңартуды жоспарлап отыр. Бұл жұмыс Үкіметтің 26 ГВт жаңа генерациялық қуат көзін іске қосу жоспарына толық сәйкес жүргізілуде.
«KEGOC» АҚ Басқарма төрағасы Нәби Айтжанов компанияның алда жүретін даму стратегиясын ұстанатынын атап өтті.
«Біздің міндет – бүгінгі күні де электр энергиясын тұрақты жеткізуді қамтамасыз етіп, сонымен қатар Қазақстанның онжылдықтар бойғы орнықты дамуының іргетасы болатын интеллектуалды әрі икемді желіні салу. Біз жаңа зауыттарды, цифрлық жобаларды және әрбір қазақстандықтың өмір сүру сапасын арттыруды энергиямен қамтамасыз етеміз» Ерлан Ақкенженов
Төрт ірі жоба бойынша іске асыру мерзімдері қысқартылды, бұл Үкімет тарапынан энергетикалық қауіпсіздік мәселелеріне жоғары басымдық берілгенін көрсетеді.
