«Шығыс» өңірлік қолбасшылығына қарасты Семей қаласындағы 5511 әскери бөлімінің 1-2025 жылғы шақырылым жас сарбаздарына қару табыстау рәсімі өтті.
Әскери оркестр сүйемелдеуінде жауынгерлік ту ортаға шығарылған арнайы іс-шарада 268 сарбаз қару алды, деп хабарлайды DKnews.kz.
Айтулы шараға әскери бөлім офицері, әскери бөлім ардагерлері сондай-ақ өзара бірлесіп іс-қимыл жасайтын органдардың өкілдері қатысты.
"Күні кеше семсер сүйіп серт беріп, ант қабылдадық. Бұл күн мен үшін мерейлі және жауапты сәт. Өйткені, қолымызға жауынгерлік қару алып тұрмыз. Өзімді құдды шайқасқа дайын бес қаруы сай батырдай сезінемін. Енді мен Ұлттық ұлан қатарында азаматтардың бостандықтары мен құқықтарын қамтамасыз етіп, ел тыныштығын күзетуде жан аямай қызмет етуге дайынмын" 5511 әскери бөлімінің қатардағы жауынгері Дәуренбек Сағынбеков
Енді сарбаздар өздеріне тапсырылған қаруға бір жыл бойы жауапты болады. Отан алдындағы борышын адал атқаруға ант берген жауынгерлер Алматы, Қарағанды, Павлодар және ШҚО облыстарынан және Алматы қаласынан әскерге шақыртылған. Алдағы уақытта мерзімді әскери қызметшілер Семей қаласындағы қоғамдық тәртіпті күзетіп сондай-ақ қылмыстық атқару жүйелерін күзету қызметін атқаратын болады.
