12 тамыз күні Қазақстанда Kcell/activ мобильді байланыс операторында ауқымды ақаулар тіркелді. Пайдаланушылардың айтуынша, елдің әр өңірінде SMS-хабарламалар, соның ішінде банк пен онлайн-сервистерден келетін растау кодтары жеткізілмей жатыр, деп хабарлайды DKNews.kz.
Әлеуметтік желілерде шағымдар таңертеңнен бастап көбейген. Адамдар төлем жасай алмай, ақша аудара алмай немесе жеке кабинетке кіре алмай отырғанын жазып жатыр. Себебі растау кодтары бар SMS мүлде келмейді.
DKNews.kz бас редакторының айтуынша, Kcell қызметіндегі ақаудың кесірінен оның бірнеше банктік операциясы орындалмай қалған - SMS-пен растаусыз қаржылық транзакцияларды аяқтау мүмкін емес.
Kcell-дің ресми түсініктемесі
Компанияда техникалық ақаудың бар екенін растады. Мәліметтеріне сәйкес, мәселе растау кодтары бар хабарламалардың бір бөлігінің жеткізілуіне әсер етіп отыр.
Біздің мамандар ақауды жою үшін жұмыс істеп жатыр. Уақытша қолайсыздықтар үшін кешірім сұраймыз және сервистің тұрақты жұмысын қалпына келтіру үшін бар күшімізді саламыз, - деп хабарлады Kcell баспасөз қызметі.
Алайда оператор мәселенің қашан шешілетінін нақтыламады.
Банктік сервистер қиындыққа ұшырады
Ақау әсіресе мобильді банкинг қолданушыларына ауыр тиді. SMS-пен растаусыз төлем жасау, ақша аудару немесе шотқа кіру мүмкін емес. Кейбір жағдайларда клиенттер жалақысын ала алмай, коммуналдық қызметтерді төлей алмауда.
Бұл алғашқы жағдай емес
Еске салсақ, шілде айында Астанада бірнеше оператор бірдей ақауға тап болды - Kcell, Tele2 және «Қазақтелеком» абоненттері уақытша байланыссыз қалған еді. Ол кезде себеп ретінде жабдықтағы апаттық жұмыстар аталған.
Қазір не істеу керек
Сарапшылар мәселе толық шешілгенше балама авторизация тәсілдерін қолдануға кеңес береді - банктік қосымшалардағы push-хабарламалар, колл-орталыққа қоңырау шалу немесе басқа операторлардың қосалқы SIM-карталарын пайдалану.
Жағдай әлі де бақылауда. Пайдаланушылар Kcell-ден тек қызметті тез арада қалпына келтіруді ғана емес, сонымен қатар байланыс пен банктік қызметтерді пайдалана алмаған уақыт үшін өтемақы төлеуді талап етуде.
