Қарағанды мұнай құбыры басқармасында әуе желілері мен электрохимиялық қорғау саласының мамандарына арналған оқу-жаттығу полигоны ашылды. Жобаның бастамашысы — бас инженер Ербол Асенов, деп хабарлайды DKNews.kz.
Полигонның құрылуы — мамандардың практикалық дайындығын нақты жұмыс жағдайларына барынша жақын ортада арттыру қажеттілігінен туындаған. Мұнда оқыту жұмысты биіктікте және электр қондырғыларымен қауіпсіз орындау дағдыларын қалыптастыруға бағытталған.
Қызметкерлер траверстерді орнату мен бөлшектеу, изоляторлар мен сымдарды ауыстыру, апатты жағдайлар кезіндегі және тірек үстінде құтқару операциялары бойынша тәжірибелік машықтарын жетілдіреді. Сондай-ақ әртүрлі кернеудегі электр қондырғыларында қауіпсіз жұмыс әдістері үйретіледі.
Оқыту барысында еңбек және өндірістік қауіпсіздік талаптарын қатаң сақтау басты назарда. Мұндай тәжірибелік дайындық өндірістегі жазатайым оқиғалар тәуекелін азайтуға, қауіпсіздікке жауапты көзқарас қалыптастыруға және еңбек қауіпсіздігі мәдениетін нығайтуға ықпал етеді.
