Бүгін, 29 тамыз – Ядролық сынақтарға қарсы халықаралық іс-қимыл күні, деп хабарлайды DKNews.kz.
Бұл маңызды күн Біріккен Ұлттар Ұйымы Бас Ассамблеясының қарарымен Қазақстанның бастамасы негізінде бекітілген.
Мемлекет басшысы Қасым-Жомарт Тоқаев осы атаулы датаға орай өзінің X әлеуметтік желісіндегі парақшасында жазба қалдырып, ядролық сынақтардың қасіретті салдарын еске алды.
«Халқымыз атом қаруын сынаудан қатты зардап шекті. Мұндай қасірет қайталанбауға тиіс. Біз кейінгі ұрпақтың жарқын болашағы үшін бейбітшілікті нығайтып, халықаралық әріптестікті дамыта түсуіміз керек. Ядролық қарудан және сынақтардан біржола бас тартуға күш салуымыз қажет. Бейбітшілік пен қауіпсіздік – бүкіл адамзатқа ортақ ең басты құндылықтар» Қасым-Жомарт Тоқаев
1991 жылы Семей полигонының жабылуы Қазақстанның әлемдік тарихтағы ерекше қадамы болды. Бұл шешім елдің бейбітшілік пен қауіпсіздікке адалдығын көрсетті. Осы бастаманың арқасында Қазақстан халықаралық аренада ядролық қарусызданудың белсенді жақтаушысына айналды.
Бүгінде Қазақстан ядролық сынақтарға тыйым салуды қолдай отырып, жаһандық қауіпсіздік пен тұрақтылықты нығайтуға бағытталған бастамаларды ілгерілетіп келеді.
Президент Тоқаев қазіргі геосаяси ахуал шиеленіскен кезеңде мемлекеттердің өзара сенімін арттыру, халықаралық ынтымақтастықты кеңейту аса маңызды екенін атап өтті.
Қазақстан әрқашан бейбітшілікті насихаттап, ядролық қарудан азат әлем құру жолында табанды жұмысын жалғастыра бермек.
