Еңбек шарттарын есепке алудың бірыңғай жүйесінде шамамен 6,2 миллионнан астам белсенді еңбек шарты тіркелген, деп хабарлайды DKNews.kz.
Ағымдағы жылдың 1 тамызындағы жағдай бойынша Еңбек шарттарын есепке алудың бірыңғай жүйесінде (ЕШЕБШ) шамамен 15,6 миллион еңбек шарты тіркелген, оның 6,2 миллионы – белсенді. Соның ішінде 1,9 миллионға жуығы 2025 жылы тіркелсе, оның 31 мыңнан астамы HR Enbek порталы арқылы электронды форматта жасалған. Бұдан бөлек, ағымдағы жылдың басынан бастап HR Enbek порталының функционалы едәуір кеңейді – енді ол жұмыс берушілер мен қызметкерлер үшін жаңа мүмкіндіктерді ұсынады.
Атап айтқанда, HR Enbek арқылы жұмыс берушілерге ұжымдық шарттарды электрондық түрде тіркеуге немесе жасасуға мүмкіндік беретін функция енгізілді. Қазіргі таңда жүйеде 8 мыңнан астам ұжымдық шарт тіркелген.
Сонымен қатар, HR Enbek порталы арқылы жұмыс берушілер еңбек инспекциясына жазатайым оқиға туралы хабарлай алады. Бүгінгі күні портал арқылы 103 жазатайым оқиға тіркелген.
HR Enbek порталы қызметкерлер үшін де мүмкіндіктер аясын кеңейтуде. Атап айтқанда, порталдан еңбекке уақытша жарамсыздық парақтары жайында ақпараттарды көруге және оларды жұмыс берушінің жеке кабинетінe жіберуге болады. Қазіргі таңда 25,3 мыңнан астам еңбекке жарамсыздық парағы жұмыс берушілерге жолданған.
Сонымен қатар, өткен жылдан бастап портал арқылы салалық, жергілікті және бастапқы кәсіподақтарды тіркеуге әрі оларға мүшелікке өтуге болады. Қазіргі таңда бұл функцияның көмегімен 42 кәсіподақ тіркелген, оның 15-і жергілікті, 6-ы бастапқы және 21-і салалық.
