Алматыда әскери міндеттілер мемлекеттік құпияларды қорғау саласы бойынша қайта даярлықтан өтті, деп хабарлайды DKNews.kz.
Радиоэлектроника және байланыс әскери-инженерлік институтының базасында «Ақпараттық қауіпсіздік» мамандығы бойынша 30 әскери міндеттіге арналған жиын өз мәресіне жетті.
Әскери жиынға шақырылған запастағы офицерлер бір ай бойы казармада тұрып, армиялық тәртіпке толықтай бағынып өмір сүрді. Теориялық және практикалық сабақтар барысында олар жалпы әскери пәндерді меңгеріп, ақпарат пен мемлекеттік құпияларды қорғаудың заманауи тәсілдерін игерді.
Радиоэлектроника және байланыс әскери-инженерлік институтының Ақпаратты қорғау кафедрасының бастығы полковник Арман Укашев бұл жиынның мақсаты мамандарды қайта даярлау арқылы әскери-оқытылған резервтің әлеуетін нығайту екенін атап өтті. Оның айтуынша, мұндай жиындар ел әскерінің мобилизациялық дайындығын арттыруға үлкен сеп болмақ.
Жиынға қатысушылардың бірі – Астанадан шақырылған запастағы лейтенант Нұрасыл Жексембаев. Қазіргі таңда ол банк саласында қызмет етеді.
"Бұл жиын біздің әрқайсымыз үшін маңызды белес болды. Қорғаныс саласы тек әскери күшпен шектелмей, ақпараттық қауіпсіздік саласындағы терең білімді де талап ететінін айқын ұғындық" Нұрасыл Жексембаев
Жиын соңында қатысушыларға арнайы сертификаттар табысталды. Ерекше көзге түскен әскери міндеттілер алғыс хаттармен марапатталды.
Бұл осы мамандық бойынша өткізілген екінші оқу-жаттығу жиыны екенін айта кету керек. Сондай-ақ, жиын кезінде әскери міндеттілердің негізгі жұмыс орындары, қызметтік лауазымдары мен айлық жалақылары сақталып, республикалық бюджет есебінен төленді.
