Су ресурстары және ирригация министрлігі Алматы облысы тұрғындарын сумен қамтамасыз ету үшін ұзындығы 142 км болатын су құбырын реконструкциялауды жоспарлап отыр, деп хабарлайды DKNews.kz.
Су ресурстары және ирригация министрі Нұржан Нұржігітов «AMANAT» партиясының ұйымдастыруымен өткен қоғамдық қабылдауда азаматтардың су шаруашылығына қатысты өзекті сұрақтарына жауап берді.
Алматы облысының Ақши ауылының тұрғындары Айдарлы, Ақши және Бозой ауылдарын, сондай-ақ жергілікті шаруашылықтарды сумен қамтамасыз етіп отырған Бозой топтық су құбырын реконструкциялау мәселесін көтерді. Бұл нысанда ұзақ уақыт бойы жөндеу жүргізілмеген.
Іле ауданы әкімдігі «Қазсушар» РМК-ның «Алатау» филиалымен жасалған меморандум аясында Бозой топтық су құбырын реконструкциялауға арналған жобалық-сметалық құжатты әзірледі. Әкімдік бюджетке өтініш бергеннен кейін, Су ресурстары және ирригация министрлігі жобаны қаржыландыру мен іске асыру мәселесін қарайды.
