Павлодар облысы Төтенше жағдайлар департаментінің құтқарушылары ауқымды оқу-жаттығу ұшуларын өткізіп, ең қысылтаяң жағдайда жерде, суда және әуеде әрекет етудегі жоғары дайындықтарын көрсетті. Оқу-жаттығу барысында ТЖМ авиациясын қолдана отырып, іздестіру-құтқару жұмыстары пысықталды, деп хабарлайды DKNews.kz.
Оқу-жаттығу «Қазавиақұтқару» АҚ МИ-8 тікұшағының қатысуымен өтіп, бірнеше кезеңді қамтыды. Бірінші бөлімнің сценарийі бойынша Ертіс өзенінің акваториясында қайық аударылып, адамдар суға кетті. Сүңгуірлер әуе кемесінің бортынан тікелей суға десантталды. Зардап шеккендер жедел анықталып, катерге көтеріліп, алғашқы көмек көрсету үшін жағаға жеткізілді.
Оқу-жаттығудың екінші бөлімінде құтқарушылар мен қызметтік иттері бар кинологтар әуеден жетуі қиын жерге түсті. Жерге қонған бойда іздестіру жұмыстары басталды. Барлық іс-қимылдар барынша шынайы жағдайда пысықталды.
Мұндай оқу-жаттығулар төтенше жағдайларға ден қоюға арналған бөлімшелерді дайындаудың ажырамас бөлігі болып табылады. Бұл жай ғана жаттығу емес, адамдарды судағы, ормандағы, таулы немесе басқа да күрделі жерлердегі кез келген жағдайда құтқаруға мүмкіндік беретін өмірлік маңызы бар дағдыларды шыңдау болып табылады.
