Астанада денсаулық пен дұрыс тамақтануға арналған ерекше Dämden фестивалі өтті, деп хабарлайды DKNews.kz.
Іс-шара бағдарламасында спорттық белсенділіктер, концерттік қойылымдар, шеберлік сабақтары, сондай-ақ демалыс пен дұрыс тамақтану орындары ұйымдастырылды, деп хабарлайды елорда әкімдігінің ресми сайты.
Таңертеңгі бөлім спортқа арналды: қонақтар йогаға, дене қыздыруға арналған жауынгерлік жаттығуға, пилатеске және зумбаға қатысты. Бұл белсенділіктер сергектік беріп, қатысушылардың басын қосты.
Одан кейін концерттік бағдарлама өтті. Көрермендер алдында Евгений Абу-Зейд, Kilemger, Keshken Kui, Tynyq топтары, рэп-орындаушы Makvin, хедлайнер Abdr және Ace (91 тобы) өнер көрсетті. Концерт аралықтарында Айтым Жақыпов көпшілікпен бірге жаттығу өткізіп, спорттық көңіл-күй сыйлады. Фестивальдің музыкалық бөлігін диджей Rahalook аяқтады.
Концертпен қатар алаңда әртүрлі шеберлік сабақтары өтті: арықтау тәсілдері, қолданбалы өнер (эко-білезік жасау), сабын қайнату, гипс бұйымдарын бояу және парфюмерия.
Қонақтардың ерекше қызығушылығын фотоаймақтар тудырды: бірінде – қайта өңдеуге арналған, келушілердің өздері жинаған пластикалық бөтелкелер қойылса, екіншісінде – әркім өзімен бірге ала алатын жемістер ұсынылды.
Фестивальде тамақтану орындары да жұмыс істеді. Олар қонақтарға фрештер, шырындар, бал, жаңа піскен жемістер мен көкөністер және әртүрлі пайдалы тағамдар ұсынды. Осылайша келушілер белсенді демалысты пайдалы ас пен отбасылық, достық қарым-қатынаспен ұштастыра алды.
Dämden фестивалі спортты, музыканы, экологиялық бастамаларды және дұрыс тамақтану мәдениетін тоғыстырған іс-шараға айналды.
