Атырау облысында жанар-жағар май құю станцияларына тиесілі жер телімдерін пайдалану заңдылығына тексерулер жүргізілуде, деп хабарлайды DKNews.kz.
2025 жылғы 30 мамырда Атырау облысы Құлсары қаласындағы газ құю станциясында орын алған төтенше жағдайға байланысты, Атырау облысының Жер ресурстарын басқару департаменті ҚР Ауыл шаруашылығы министрлігінің Жер ресурстарын басқару комитетімен бірлесе отырып, автогаз құю станциялары орналасқан жер телімдерін пайдалану заңдылығына жоспардан тыс тексерулерді бастады.
Еске сала кетейік, АГЗС-тегі жарылыс салдарынан өрт шығып, бірдей үш бірқабатты құрылыс, станцияның өзі және оның артындағы екі қабатты ғимарат зардап шекті. Бірнеше адам жарақат алып, екеуі қаза тапты.
Тексеру барысында жер телімдерін мақсатсыз пайдалану фактілері анықталды. ҚР Жер кодексінің 65-бабына сәйкес, жер пайдаланушылар жер телімдерін олардың нысаналы мақсатына және шарт талаптарына сай пайдалануға міндетті. Бұл талаптардың бұзылуы ҚР Жер кодексінің 93-бабына және Әкімшілік құқық бұзушылық туралы кодекстің 339-бабына сәйкес әкімшілік жауапкершілікке әкеп соғады.
Тексеру нәтижесінде 8 әкімшілік іс қозғалды, заңбұзушылыққа жол берген газ құю станцияларының иелеріне айыппұлдар салынды. Сонымен қатар, анықталған заңбұзушылықтарды жою туралы міндетті нұсқамалар берілді.
Атырау облысының Жер ресурстарын басқару департаменті облыс аумағындағы автогаз құю станцияларының жер телімдерін заңды әрі қауіпсіз пайдалануын қамтамасыз ету мақсатында жоспардан тыс тексерулерді жалғастыруда.
