Қазақстан шахматшылары Самарқандта өтетін үміткерлер турниріне жолдаманы сарапқа салады, деп хабарлайды DKNews.kz.
Қазақстандық төрт шахматшы Самарқандта өтетін ФИДЕ «Үлкен Швейцария» турнирінде жарысқа түседі. Осынау беделді турнирде еліміздің намысын Бибісара Асаубаева, Меруерт Камалиденова, Ксения Балабаева және Елназ Қалиахмет қорғайды. Бибісара, Ксения және Меруерт 2024 жылы Будапешт қаласында өткен шахмат Олимпиадасында күміс медаль жеңіп алған Қазақстан әйелдер құрамасының ойыншылары. Біздің қыздардың әрқайсысы шахмат сүйер қауымды таң қалдырарлық тамаша ойын көрсетуге және жеңімпаз орындарын алу үшін күресуге қабілетті.
2025 жылғы 3 қыркүйекте Самарқандта FIDE «Үлкен швейцар турнирінің» салтанатты ашылу рәсімі өтті. 4-15 қыркүйек аралығында екі турнир: ерлер арасындағы турнир (FIDE Grand Swiss) және әйелдер турнирі (FIDE Women’s Grand Swiss) өтеді. Оның әрқайсысында әлемдік шахмат тәжіне үміткерлер анықталатын 2026 жылғы үміткерлер турниріне екі жолдама сарапқа салынады. Жалпы жүлде қоры 855 000 АҚШ доллары. Ерлер арасындағы турнирде 625 000 доллар бөлінеді, оның 90 000 доллары жеңімпазға табыс етіледі. Әйелдер турнирінде 230 000 доллар бөлінеді, жеңімпазға 40 000 доллар беріледі, ал 16–23-ші орындарға ие болғандардың әрқайсысына 3000 доллардан бұйырады.
Әйелдер арасындағы турнирге 56 шахматшы қатысады. Олардың арасында көп дүркін әлем чемпионы Хоу Ифань (2609, Қытай), қазіргі чемпион Цзюй Вэньцзюнь (2570, Қытай) және Гран-при 2024–2025 мен Әлем кубогы арқылы турнирге іріктелген үміткерлер Чжу Цзиньэр (2548, Қытай), Александра Горячкина (2528, FIDE), Дивья Дешмух (2478, Үндістан) және Хампи Конеру (2535, Үндістан) жоқ. Бірақ Әлем кубогынан өткен Тань Чжунъи (2531, Қытай) Самарқандта өтетін жарысқа қатысады. Турнирдің құрамы әсерлі: онда ойнайтын төрт гроссмейстер — Анна Музычук (2535, Украина), Тань Чжунъи, Катерина Лагно (2505, FIDE) және Бибісара Асаубаеваның (2505) рейтингі — 2500 және одан жоғары, тағы 22 қатысушының рейтингі — 2400 және одан жоғары.
Аталмыш жарыста Қазақстан намысын гроссмейстер Бибісара Асаубаева, халықаралық шебер Меруерт Қамалиденова (2349), әйелдер арасындағы гроссмейстер Ксения Балабаева (2383) және әйелдер арасындағы халықаралық шебер Елназ Қалиахмет (2299) қорғайды.
Ерлер арасындағы турнирде 116 ойыншы, соның ішінде рейтингі 2700 және одан жоғары 18 супергроссмейстер бас қосады. Олардың қатарында қазіргі әлем чемпионы Гукеш Доммараджу (2767, Үндістан), сондай-ақ 2024 жылғы Олимпиадада жеңіске жеткен құрамадағы серіктестері Рамешбабу Прагнанандха (2785) мен Арджун Эригайси (2771) бар.
Екі турнир аясында швейцариялық жүйе бойынша 11 турдан өтеді. Ерлер ойнайтын уақыт бақылау нұсқасы: алғашқы 40 жүріске 100 минут, келесі 20 жүріске 50 минут және партияның соңына дейін 15 минут беріледі және әр жүріс үшін біріншісінен бастап 30 секунд қосылады. Әйелдерге алғашқы 40 жүріске 90 минут және партияның соңына дейін 30 минут беріледі және әр жүріс үшін біріншісінен бастап 30 секунд қосылады. Соңғысынан басқа барлық турлар Қазақстан уақыты бойынша сағат 15:00-де басталады. Финалдық 11-ші тур сағат 14:00-де басталады. Демалыс күні 10 қыркүйекке жоспарланған.
Самарқанд қаласында өтетін ФИДЕ «Үлкен Швейцария» турнирінің тартысты өтетіні анық. Қазақстанның шахматшы қыздары асқан шеберлігін көрсетіп, үміткерлер турниріне жолдама үшін күресуге дайын.
