Оңтүстік Кореяда өткен беделді жасөспірімдер турнирінде қазақстандық теннисші Зангар Нұрланұлы жарқын жеңіске жетті, деп хабарлайды DKNews.kz.
ITF жасөспірімдер рейтингінде әлемнің 25-ракеткасы саналатын Зангар Нұрланұлы Кореяның Чхунчхон қаласында өткен J200 санатындағы турнирдің чемпионы атанды.
Турнирдің бірінші нөмірлі спортшысы ретінде бақ сынаған Зангар қарсыластарына бірде-бір сет бермей, сенімді ойын көрсетті. Финалда ол кореялық Мин Хук Чоға қарсы 6:3, 6:4 есебімен жеңіске жетті.
Чхунчхонда қол жеткізген бұл жеңіс Нұрланұлының жеке разрядтағы алтыншы ITF Juniors титулы болды. Бұған дейін ол келесі турнирлерде топ жарған:
- J100 Aizkraukle (Латвия)
- J200 Shymkent (Қазақстан)
- J100 Izmir (Түркия)
- J30 Tsaghadzor (Армения)
- J30 Trnava (Словакия)
Келесі аптада Зангар Нұрланұлы 18 жасқа дейінгі ойыншылар арасында Азияның бейресми чемпионаты саналатын ITF Juniors J300 Wonju турнирінде өнер көрсетеді.
