Қазақстан азаптауға қарсы күресті күшейтуде: назар – психологиялық зорлық пен мамандар даярлығында
Варшавада өтіп жатқан ЕҚЫҰ-ның адам өлшемі жөніндегі конференциясының тақырыптық сессиясында әлеуметтік жұмыс бойынша PhD докторы Динара Есимова Қазақстанның бұл саладағы халықаралық міндеттемелерді дәйекті түрде жүзеге асырып келе жатқанын атап өтті, деп хабарлайды DKNews.kz.
Ол Мүгедектер құқықтары туралы конвенцияның Факультативтік хаттамасын ратификациялау еліміз үшін маңызды қадам болғанын еске салды. Бұл құжат Әлеуметтік кодекске өзгерістер енгізуге және функциялаудың халықаралық жіктемесін (МКФ) енгізуге жол ашады. Онда мүгедектік медициналық шектеу емес, эволюциялық ұғым ретінде қарастырылады.
«Бүгін азаптау тек физикалық зорлық емес екенін түсіну маңызды. Ол сондай-ақ эмоциялық және психологиялық зорлық-зомбылықты да қамтиды, әсіресе мүгедектігі бар адамдар, балалар мен қарт азаматтар сияқты осал топтарға қатысты» Динара Есимова
Оның айтуынша, Стамбұл хаттамасының екінші нұсқасы шамамен 70%-ға дейін психологиялық зорлық мәселелеріне арналған және ол медицина қызметкерлері, әлеуметтік қызметтер, интернаттар мен уақытша ұстау орталықтарының қызметкерлері үшін міндетті кәсіби даярлықтың бір бөлігіне айналуы тиіс.
Есимова атап өткендей, Стамбұл хаттамасын тиімді пайдалану пәнаралық білімді және кешенді тәсілді талап етеді. Ол осы хаттама ережелері бойынша мультидисциплинарлық топтар мен әлеуметтік қызметкерлерге арналған жүйелі оқытуды енгізуді ұсынды.
«Азаптау мен зорлық-зомбылықтың психологиялық аспектілері туралы білімді кеңейту – құқық бұзушылықтарды тиімді тіркеуге және, ең бастысы, адамның қадір-қасиеті мен құқықтарын қорғауға мүмкіндік береді» Динара Есимова
