Сенатта Сенаторлар кеңесінің мүшесі «Құқықтағы жасанды интеллект» тақырыбы бойынша дәріс оқыды. Оны құқық қорғау органдарында, әділет жүйесінде және мемлекеттік құрылымдарда 40 жылдан астам тәжірибесі бар заң ғылымдарының кандидаты, мемлекет және қоғам қайраткері Георгий Ким жүргізді. Ол әр жылдары Әділет министрі, Бас прокурордың орынбасары, Конституциялық Соттың судьясы, сондай-ақ ҚР Парламенті Сенатының депутаты қызметтерін атқарған болатын, деп хабарлайды DKNews.kz.
Георгий Ким Аппарат қызметкерлерінің алдында сөйлеген сөзінде цифрлық технологиялардың қарқынды дамуы құқықтық қатынастарды түсіну мен реттеуге жаңа көзқарасты талап ететінін атап өтті. Оның айтуынша, технологиялар қазірдің өзінде өмірден озып келеді. Ал цифрландыру – бұл құқықтық ғылым мен мемлекет тарапынан жүйелі түсінуді және уақтылы ден қоюды талап ететін күрделі этикалық, құқықтық және әлеуметтік сын-қатер туғызатын заңнама.
«Жасанды интеллект – бұл деректерді талдау құралы ғана емес, адамның цифрлық профиліне сәйкес құқықтық аспектілерді бағалауға қабілетті ақпараттық-құқықтық сараптама платформасы. Жасанды интеллекті пайдалану тек технологиялық прогресс ретінде ғана емес, сонымен қатар азаматтардың құқықтары мен міндеттерінің тепе-теңдігіне, сондай-ақ сот төрелігінің тиімділігі мен мемлекеттік басқарудың ашықтығына әсер ететін фактор ретінде қарастырылуы керек», - деп атап өтті Георгий Ким.
Экс-сенатордың айтуынша, жасанды интеллект саласындағы реттеу халықаралық этика, жауапкершілік және адами өлшемге құрмет принциптеріне негізделуі керек.
Георгий Ким қорытындылай келіп, жасанды интеллект адам әлеуетін дамытуға, әлеуметтік әділеттілікті жетілдіруге және құқықтық институттарға деген сенімді нығайтуға қызмет етуі керек және адам мен оның моральдық таңдауын алмастырмауы тиіс деп атап өтті.
