Елімізде өрттің және адам өлімінің алдын алуға, сондай-ақ халықтың өртке қарсы мәдениетінің деңгейін арттыруға бағытталған өрт қауіпсіздігінің республикалық профилактикалық айлығы жалғасуда, деп хабарлайды DKnews.kz.
Айлықтың іс-шараларын іске асыруға ТЖМ бөлімшелерімен бірлесіп жергілікті атқарушы органдар, волонтерлер, бұқаралық ақпарат құралдары және қоғамдық бірлестіктер тартылды.
Акция аясында өрт қауіпсіздігі деңгейін арттыруға бағытталған кең ауқымды іс-шаралар өткізілуде. Тұрғын үй секторындағы профилактикалық жұмыстарға, пештерді, электр және газ жабдықтарын пайдалану кезіндегі өрт қауіпсіздігі талаптарын түсіндіруге ерекше назар аударылады.
Профилактикалық аралау барысында тұрғындарға тұрмыстағы өрт қауіпсіздігінің негізгі шаралары түсіндіріледі. Жылыту пештерінің, түтін мұржаларының, электр сымдары мен электр жабдықтарының жай-күйі, сондай-ақ өрт датчиктерінің болуы мен жарамдылығы бағаланады. Өрт қауіпсіздігі талаптарына анықталған сәйкессіздіктер тұрғындарға міндетті түрде жеткізіледі. Бүгінгі таңда 800 мыңнан астам адам консультативтік көмек алды.
ТЖМ бөлімшелері халықтың әлеуметтік осал топтарының 108 мыңнан астам тұрғын үйін, сондай-ақ 225 мыңнан астам көпбалалы отбасын есепке алды.
Бұл үйлерде жылыту жүйелері мен электрмен жабдықтауды жөндеуге көмек көрсетілуде, түтін мұржаларын күйеден тазарту және басқа да алдын алу жұмыстары жүргізілуде. Аулаларды аралау барысында барлығы 23 мыңнан астам үй өрт қауіпсіз жағдайға келтірілді.
Жергілікті атқарушы органдармен және волонтерлермен бірлесіп, газ бен жану өнімдерінің қауіпті концентрациясын анықтайтын 24,7 мың датчик орнатылды.
Үйлерді аралау барысында жиі анықталатын негізгі бұзушылықтар пеш жабдықтарын, электр желілері мен аспаптарды орнату және пайдалану ережелерін сақтамау болып табылады: пештер мен түтін мұржаларындағы жарықшақтар, пеш алдында төсеменің болмауы, жанатын конструкциялардан өртке қарсы арақашықтықтың сақталмауы, электр желілерінің шамадан тыс жүктелуі, электр сымдарының зақымдалған оқшаулануы және басқалар. Мұндай бұзушылықтарды жою, әдетте, айтарлықтай материалдық шығындарды қажет етпейді.
ТЖМ еске салады: әркім өз үйін қауіпсіз ете алады! Ол үшін өрт қауіпсіздігінің қарапайым ережелерін сақтау қажет:
- тек ақаусыз пештер мен электр құрылғыларын пайдаланыңыз;
- пештерді, электр және газ жабдықтарын жөндеуге және орнатуға тек білікті мамандарға сеніңіз;
- пештердің қызып кетуіне және электр желілерінің шамадан тыс жүктелуіне жол бермеңіз;
- мұржаны күйеден уақтылы тазалаңыз;
- пештер мен электр құрылғыларының ақаулықтарын үнемі тексеріп отырыңыз;
- пешті жағуға балаларға тапсырмаңыз;
- сіріңкелер мен тұтандырғыштарды балалардың қолы жетпейтін жерлерде сақтаңыз.
