36814 әскери бөлімінің құрылған күніне орай Шымкент гарнизонында армиялық қоян-қолтық ұрысынан күштік құрылымдар мен құқық қорғау органдарының қатысуымен дәстүрлі командир Кубогы ұйымдастырылды, деп хабарлайды DKNews.kz.
Жарыс Шымкент қаласындағы Қажымұқан спорт кешенінде өтіп, нағыз тартысты әрі жоғары дайындықты талап еткен бәсекеге айналды.
Биылғы турнирге гарнизонға қарасты бөлімдерден және арнайы құрылымдардан құралған 8 команда, жалпы саны 77 спортшы қатысты. Жарыс 7 салмақ дәрежесі бойынша өткізіліп, әр қатысушы өз бөлімінің абыройын қорғап, жоғары шеберлік танытуға тырысты.
Шараның ашылуында 36814 әскери бөлімінің командирі полковник Ұлықбек Сақ қатысушыларға сәттілік тілеп, қоян-қолтық ұрыстың әскери маман үшін маңызын атап өтті:
«Қоян-қолтық ұрыс — жауынгердің дене дайындығын шыңдайтын ғана емес, оның ерік-жігерін, мінезін, жылдам шешім қабылдау қабілетін қалыптастыратын маңызды жаттығу. Бұл спорт түрі — жауынгерлік рухты көтерудің, бөлімдер арасындағы ынтымақтастықты арттырудың тиімді құралы. Бүгінгі жарыс біздің бөлім үшін ғана емес, бүкіл гарнизонның кәсіби бәсекелестігін нығайтуға бағытталған маңызды іс-шара», — деді полковник Ұлықбек Сақ.
Төрешілер біліктілігімен және қатысушылардың жоғары дайындық деңгейімен ерекшеленген жарыс әр салмақта қызу тартыспен өтті. Әскерилер мен құқық қорғау органдарының жауынгерлері техникалық, тактикалық және күштік мүмкіндіктерін барынша көрсетті.
Жарыстың жалпы нәтижесінде командалар арасындағы тартыс өте жоғары деңгейде өтті. Командалық есеп бойынша бірінші орынды барлық салмақ дәрежелерінде үздік өнер көрсеткен 36814 әскери бөлімі жеңіп алды. Екінші орынға финалдық жекпе-жектерде мықтылық танытқан Шымкент қалалық «Арлан» жасағы лайық болды. Ал тұрақты техникалық дайындық көрсеткен 55652 әскери бөлімі жалпы есепте үшінші орынды иеленді.
Жарыс соңында үздік спортшылар мен командалар медальдармен, грамоталармен және Кубокпен марапатталды. Ұйымдастырушылардың айтуынша, мұндай турнирлер әскери қызметшілердің шеберлігін арттырып қана қоймай, гарнизон бөлімдері арасындағы достық пен ынтымақтастықты нығайтады.
