Қазақстандық лоукостер FlyArystan Ақтау – Дубай жаңа халықаралық бағыты бойынша алғашқы рейсті орындады, деп хабарлайды DKNews.kz.
Ақтаудан Дубай Халықаралық әуежайына бағытталған FS7617 инаугурациялық рейсі салтанатты түрде өтті: ұшу залына келген жолаушыларды жаңа бағыттың ашылуына арналған түрлі сыйлықтар, тағамдар және арнайы қарсы алу белсенділіктері күтті.
Маңғыстау облысы әкімінің орынбасары Аббат Өрісбаев салтанатты шараның құрметті қонағы болды. Оның қатысуы жаңа халықаралық бағыттың өңір үшін маңызын атап өтті. Жолаушылардан бөлек, іс-шараға әуекомпания серіктестері мен Ақтау Халықаралық әуежайының өкілдері де қатысты.
«Ақтау – FlyArystan үшін стратегиялық маңызы бар қалалардың бірі. Біз Батыс Қазақстан тұрғындары үшін жаңа мүмкіндіктер ашу мақсатында оның маршруттық желісін жүйелі түрде кеңейтіп келеміз. Маңғыстау облысына да, осы өңірден де туристік және іскерлік мақсаттағы сапарларға деген сұраныс жоғары әрі тұрақты екенін атап өтеміз. Дубайға тікелей рейстің іске қосылуы – батыс өңірдегі базамыздың халықаралық әлеуетін арттырудағы маңызды қадам. Біз жолаушыларымыз үшін қолайлы, қолжетімді және сенімді бағыттарды әрі қарай дамытуды жалғастырамыз» Ричард Леджер, «FlyArystan» АҚ Президенті
Дубай жыл бойына созылатын туристік маусымымен, заманауи инфрақұрылымымен, оқиғаларға толы мәдени-іскерлік өмірімен және кең бизнес-мүмкіндіктерімен қазақстандықтар арасында ең танымал бағыттардың бірі болып қала береді.
Рейс қарсаңында Airbus компаниясы A320 әуе кемелеріне бағдарламалық қамтамасыз етуді міндетті түрде жаңартуды талап ететін ұшу жарамдылығы жөніндегі директива жариялады. FlyArystan әуекомпаниясы бұл талаптарды жедел орындап, жоспарланған кестені сақтауға және алғашқы рейсті уақытында орындауға мүмкіндік алды.
Алғашқы кезеңде Ақтау – Дубай рейсі аптасына бір рет – сенбі күндері орындалады. Ақтаудан ұшу уақыты – 09:10, Дубайға келу – 11:55. Кері рейс 13:00-де ұшып, Ақтауға 17:50-де қонады. Күндізгі рейстер кестесі және шамамен 3,5 сағаттық ұшу ұзақтығы бұл бағытты отбасымен саяхаттауға, мерекелік сапарларға және қысқа демалыстарға ерекше ыңғайлы етеді.
«Ақтау – Дубай тікелей рейсінің іске қосылуы Маңғыстау облысы жолаушылары үшін жаңа мүмкіндіктер ашатынына және өңір арқылы транзиттік ағымның өсуіне ықпал ететініне сенімдіміз. Әуе тасымалдаушылар тарапынан артып келе жатқан қызығушылық өңірдің халықаралық маршруттардағы маңызын дәлелдейді және Ақтау әуежайының батыс өңірдегі негізгі көлік торабы ретіндегі рөлін нығайтады. Әуежай өз кезегінде инфрақұрылымды жаңғырту және жолаушыларға қызмет көрсету деңгейін арттыру стратегиясын жалғастыра отырып, барлық жолаушылар үшін жайлы жағдайлар жасауда» Меруерт Жолдыбаева, «Ақтау Халықаралық әуежайы» АҚ Бас директоры
Қосымша рейстер желтоқсанның 16-сы мен қаңтардың 6-сы аралығында, сондай-ақ 2026 жылдың 10-24 наурызы аралығында сейсенбі күндері орындалады.
Ақтау – Дубай бағыты бойынша әуебилеттер www.flyarystan.com сайтында, FlyArystan мобильді қосымшасында және ресми сату арналары арқылы қолжетімді. Стандартты тарифке борттағы кездейсоқ орын және салмағы 5 кг-ға дейінгі (өлшемі 56 × 23 × 36 см-ден аспайтын) бір дана қол жүгін алып жүру кіреді.
