Air Astana тобының инженерлері 38 Airbus ұшағының бағдарламалық жасақтамасын толығымен жаңартты, деп хабарлайды DKNews.kz.
Air Astana тобы Airbus ұшақтарындағы бағдарламалық жасақтамасын жаңарту бойынша жұмыстар аяқталғанын және ұшу кестесі қалпына келіп жатқанын хабарлайды. Air Astana тобы жедел және кәсіби әрекеттері үшін инженерлік-техникалық құрамына алғыс білдіреді. Ұшу қауіпсіздігі - біздің басымдығымыз.
Еуропалық авиациялық қауіпсіздік агенттігі (EASA) 2025 жылдың 28 қарашасында ұшуға жарамдылық жөніндегі шұғыл директиваны жариялап, ол 29 қарашада күшіне енді. A320 әуе кемелеріндегі ақау әлем бойынша шамамен 6000 ұшақты қамтыды.
Директива Airbus A320 ұшағында тіркелген оқиғадан кейін шығарылды. Оқиға барысында автопилот қосулы тұрған кезде ұшақ кенеттен төмендеп, биіктікті басқаруға жауапты рульдің қысқа мерзімді өздігінен істен шығуы байқалған.
