Қазақстан мен Қытай арасындағы жан-жақты стратегиялық әріптестіктің жаңа кезеңінде жастар ынтымақтастығы екі ел қарым-қатынасының негізгі тіректерінің біріне айналып отыр. Осы орайда Қытай Халық Республикасының Қазақстан Республикасындағы Елшілігінде «Жастарды танып, жастарды түсіну: Қытай мен Қазақстанның Z буыны жастарының диалогы» атты семинар өтті.
Іс-шара Қытай мен Қазақстан жастары арасындағы диалогты тереңдету, өзара түсіністікті арттыру және бірлескен болашаққа бағытталған жаңа бастамаларды талқылау мақсатында ұйымдастырылды. Семинарға дипломатиялық корпус өкілдері, жастар ұйымдарының жетекшілері, қоғамдық қайраткерлер, сарапшылар мен Z буынына жататын белсенді жастар қатысты.
Елші Хань Чуньлин: «Жастар – достықтың сабақтастығын жалғастыратын негізгі күш»
Семинардың ашылуында сөз сөйлеген Қытай Халық Республикасының Қазақстандағы Төтенше және Өкілетті Елшісі Хань Чуньлин Қазақстан мен Қытайдың тек көрші елдер ғана емес, ортақ тағдыр мен ортақ мақсат жолында иық тірестіре келе жатқан сенімді серіктестер екенін атап өтті.
«Қытай мен Қазақстанды таулар мен өзендер ғана емес, ортақ арман мен болашаққа деген сенім байланыстырады. Соңғы отыз жылдан астам уақытта екі ел арасындағы қатынастар достық көршілік деңгейінен жан-жақты стратегиялық әріптестікке дейін көтерілді», – деді Елші.
Оның айтуынша, екі ел басшыларының стратегиялық басшылығының арқасында Қытай мен Қазақстан «ортақ мүдделер қауымдастығынан» «ортақ тағдыр қауымдастығын» құру деңгейіне жетіп, халықаралық қатынастарда үлгі боларлық модель қалыптастырды.
Гуманитарлық және жастар жобалары – стратегиялық әріптестіктің берік іргетасы
Хань Чуньлин жастар ынтымақтастығының нақты нәтижелеріне тоқталып, Қазақстанда жүзеге асырылып жатқан бірқатар білім беру және гуманитарлық жобаларды ерекше атап өтті.
«Инженерлік кадрлар даярлайтын Солтүстік-Батыс политехникалық университет филиалы, мәдени байланысты нығайтатын Пекин тіл және мәдениет университетінің филиалы, сондай-ақ практикалық дағдыларды үйрететін “Лу Бань шеберханасы” – мұның бәрі екі ел жастарының дамуына арналған маңызды алаңдар», – деді ол.
Сонымен қатар өзара туризм жылдары, мәдени орталықтардың ашылуы, жастар лагерьлері мен ғылыми форумдар жастар арасындағы түсіністікті тереңдетіп, достықтың берік көпіріне айналып отырғаны атап өтілді.
Қытайдағы жастар саясаты: мемлекеттік басымдық
Елші өз сөзінде Қытайда жастарды дамыту ұлттық дамудың басым бағыты ретінде қарастырылатынын айтты.
«Қытайда жастарды қолдау – ұран емес, нақты іске асырылып жатқан жүйелі саясат. Білім беру, жұмыспен қамту, инновация мен кәсіпкерлікте жастарға тең мүмкіндік беруге ерекше мән беріледі», – деді Хань Чуньлин.
Оның айтуынша, Қытайда мыңдаған стартап-инкубаторлар, инновациялық парктер мен ғылыми орталықтар жастардың идеяларын нақты нәтижеге айналдыруға жағдай жасап отыр. Мемлекет сондай-ақ жас ғалымдар мен мамандардың халықаралық жобаларға қатысуына кең мүмкіндіктер ұсынады.
«Жастар Рухы»: жастар диалогы – болашақ көшбасшыларға инвестиция
Семинар барысында партия «AMANAT» жанындағы «Жастар Рухы» жастар қанатының төрағасы Акерке Искандерова сөз сөйлеп, Қазақстан мен Қытай жастары арасындағы ынтымақтастықтың маңызын атап өтті.
«Z буыны – бұл жаһандық ойлайтын, цифрлық шешімдерге бейім және ашық диалогқа дайын ұрпақ. Жастарды түсіну – олардың дауысын есту, ал танып-білу – болашақтың күн тәртібін бірге қалыптастыру», – деді ол.
Акерке Искандерованың айтуынша, соңғы жылдары екі ел жастары арасында өзара сапарлар, мәдени және білім беру алмасулары, тәжірибе бөлісу алаңдары белсенді дамып келеді.
Ассамблея жастары: жастар – бүгінгі күннің қозғаушы күші
Қазақстан халқы Ассамблеясы Кеңесінің мүшесі, «Ассамблея жастары» РҚБ төрағасы Тимур Джумурбаев өз сөзінде жастардың халықаралық ынтымақтастықтағы рөліне ерекше тоқталды.
«Жастар – тек болашақ емес, бұл – біздің бүгініміз. Олар жаһандық өзгерістерге тез бейімделіп, жаңа технологияларды меңгеріп, жаңа форматтағы ынтымақтастықты қалыптастырып келеді», – деді ол.
Ол Қазақстан мен Қытай жастары арасындағы ынтымақтастықты дамытуда мәдениетаралық диалог, жоғары технологиялар, жасанды интеллект, студенттік бастамалар, жастар кәсіпкерлігі мен жастар дипломатиясы негізгі бағыттар болуы тиіс екенін атап өтті.
