Мемлекет басшысы Қасым-Жомарт Тоқаев көмірсутектер мен уран саласындағы реттеуді жетілдіруге бағытталған «Қазақстан Республикасының “Жер қойнауы және жер қойнауын пайдалану туралы” кодексіне өзгерістер мен толықтырулар енгізу туралы» заңға қол қойды, деп хабарлайды DKNews.kz.
Мемлекет басшысы «Жер қойнауы және жер қойнауын пайдалану туралы» Қазақстан Республикасының Кодексіне көмірсутектер мен уран саласында жер қойнауын пайдалануды жетілдіру мәселелері бойынша өзгерістер мен толықтырулар енгізу туралы» Қазақстан Республикасының Заңына қол қойды Akorda
Құжаттың негізгі мақсаты – индустриялық сектордың инвестициялық тартымдылығын арттыру және жер қойнауын пайдалану саласындағы жұмыс ережелерін бизнес үшін барынша түсінікті әрі ашық ету.
Маңызды жаңашылдықтардың бірі – Жер қойнауын пайдалану жөніндегі бірыңғай порталды енгізу. Ол пайдалы қазбаларды барлау мен өндіруге қатысты деректер мен рәсімдерді біріктіретін саланың бірыңғай ақпараттық жүйесі ретінде жұмыс істейді.
Заң қатты пайдалы қазбаларды барлауға лицензия беруден бас тарту негіздерін де кеңейтеді. Бұл соңғы бес жыл ішінде қол қою бонусын төлеуден жалтарған аукцион жеңімпаздарына, сондай-ақ осындай жеңімпазды бақылаған тұлғалар мен ұйымдарға қатысты.
Сонымен қатар қатты пайдалы қазбалар саласындағы уәкілетті органның ведомстволық бағынысты ұйымына қосымша өкілеттіктер беру ұсынылады. Ол геологиялық ақпаратты жинау, сақтау, өңдеу және осы деректерге қолжетімділік ұсыну үшін жауапты болады.
Құжатта сондай-ақ барлау үшін жаңадан босатылған блоктар бойынша лицензия алуға өтінімдерді қарау тәртібі, барлау кезеңінде пайдалы қазбаларды өндіру тәртібі, сондай-ақ өнеркәсіптік санаттағы қатты пайдалы қазбалар қоры бар жер қойнауы учаскелері бойынша аукциондар өткізу қағидалары егжей-тегжейлі айқындалған. Мемлекеттік есепте тұрған кең таралған пайдалы қазбалар мен уран бұл тізімге кірмейді.
Өнеркәсіптік-инновациялық және индустриялық-инновациялық жобалар аясында жер қойнауын пайдалану құқығын беру тәртібіне де ерекше назар аударылған. Заң авторларының пікірінше, бұл инвестиция тартуды және қайта өңдеу өндірістерін дамытуды ынталандырады.
