Мемлекет басшысы Қасым-Жомарт Тоқаев қазақстандық шахматшы Бибісара Асаубаеваға блиц бойынша әлем чемпионатындағы айрықша жеңісіне байланысты құттықтау жолдады, деп хабарлайды DKNews.kz.
Президент өз құттықтауында бұл жетістіктің отандық және әлемдік спорт үшін тарихи маңызын атап өтті.
«Бибісара Асаубаева әлемдік шахмат тарихына көрнекті шебер әрі Қазақстаннан шыққан блиц бойынша үш дүркін әлем чемпионы атанған тұңғыш спортшы ретінде енді» Қасым-Жомарт Тоқаев
Сондай-ақ Мемлекет басшысы шахматшының бұл табысы бүкіл ел үшін зор мақтаныш екенін атап өтті.
«Қазақстанның бүкіл шахмат қауымдастығы жаһандық аренада еліміздің туын биікке көтерген отандасымызды орынды түрде мақтан тұтады» Делінген құттықтауда
Оның жетістіктерін және Қазақстанда шахматты дамытуға қосқан үлесін мойындау белгісі ретінде Мемлекет басшысы оны мемлекеттік наградамен марапаттау туралы шешім қабылдады.
«Бибісара Асаубаеваның халықаралық турнирлердегі тамаша жетістіктерін және елімізде шахматты дамытуға қосқан елеулі үлесін мойындау белгісі ретінде оны II дәрежелі «Барыс» орденімен марапаттау туралы шешім қабылдадым» Деп атап өтті Президент
Бибісара Асаубаеваның жеңісі Қазақстанның әлемдік шахмат аренасындағы позициясын нығайтып, отандық спорт мектебінің табысты үлгісіне айналды.
Бибісара Асаубаева блиц бойынша әлем чемпионы атанған қазақстандық алғашқы үш дүркін чемпион. Ол бұған дейін 2021 және 2022 жылдары да әлем чемпионаттарында жеңіске жеткен.
